سەرنووچە:

بانگەشا دیمۆکراسیەتێ و ئەرستوکراسیەت د پراکتیکێ دا

2/17/2019 2:46:09 PM
2394 جار خوێندراوەتەوە
جاسم سەبرى
+ -

دڤی ناڤ و نیشانی دا دبیت ھەڤدژیەکا زمانی ھەبیت لێ دژیوارێ ئەڤرۆ یێ پتریا وەلاتێن روژھەلاتا ناڤین بگشتی و ھەرێما کوردستانێ بتایبەتی دا بویە واقعەکێ دیار و درۆست کار لژێر سیبەرا ئەڤی ناڤ و نیشانی دا دھێت کرن .
 دیمۆکراسیەت ئەو زاڕاڤ و سیستەمێ بوویە بەرەکەتا پێشکەفتن و پێشەسازیێ بۆ ‌تەڤایا وەلاتێن روژئاڤایی و مللەتێن پێشکەفتی دجیھانا ئەڤرۆکە دا ، ئەم دوەلاتەکێ چار پارێزگەھـ و شەش ملیونی دا ژبەر دنالینن ، دیمۆکراسیەت ئەو سیستەمێ سەرۆکێ ئەمریکا یێ بەرێ ئبراھام لینکولنی بھەمی فەخر و شانازیڤە پێناسەکری " دەستھەلاتا گەلی ژ گەلی بۆ گەلی " ، چەندە جھێ شەرم و داخێ یە سیاسیەکێ کورد ھەمان پێناسە بدەتێ دواقعەکێ پری گەندەلی و دووئیدارەیی و دەرەبەگ و ئاغاعەشیر و خودمختاری و ئەرستوکراسی و ئولیگارکی دا ، 
بھەمی واتەیان دیموکراسیەت ژ قالبێ دروشمێ زێدەتر لڤێرێ دەرباز نەبوویە و چجاران جھێ خوە دپراکتیکێدا نەکریە ،
ئەڤەژی ژئەگەرێ ھەبوونا دەستھەلاتا دووھێزێن سیاسی و چەکداری یە ل دوو زونێن دیارکری دا ،
ھەریەک ژ وان خوەدی دەستھەلاتەکا دەستنیشانکری یە لژێر دابەشکرنا  ناڤ و پلە و پوست و سنور و گومرک و کێلگەیێن نەفتێ و ھێز و چەک  و ئابور  ..ھتد،
ھەبوونا ھەلبژاردن و پروسێسا پەرلەمانی بتنێ درامایەکا دووبارەکریە ھەرسال بھەمان سیناریوو دھێتە پەخش کرن .
زێدەباری ھاتنا یاریکەرێن سیاسی یێن نوی و ھاتنا کومەل و لیست و قەوارەیێن سیبەر و خاپاندنا ھاولاتیان ھەرجار ب بەھانەیەکا چێکری و پلان بۆ دارشتی ،
یاری بھەست و پاشەروژا خەلکێ دھێتە کرن ب تایبەتی ب چەواشەکاریا ھندەک دەزگەھێن زمان حالێن حزبی لژێر ناڤ و نیشانێن راگەھاندنا ئازاد و کەنالێن بێ لایەن ،
ھەرجارەکێ خەلکێ ئەڤی وەلاتی ب تشتەکێ بێ بوھا ڤە دھێتە مژویلکرن مینا سازان و پاشکەفت و کومبینێن دوو قولی و پێنج قولی و سیستەمێ ئەلکترونی  و نەبونا بودجەی و خشتەیێ موچەیی و چاکسازیا کارگێری و  ھتد ..
ئەڤە ٢٧ سالە دحەفت کابینێن بوری یێن حکومەتێ دا و دگەل ئەڤێ کابینا نێزیک چوار ھەیڤایە حزبێن کوردی لسەر ناکوک ، ڕەوشا ھاولاتیێن ئەڤێ دەڤەرێ دڕەوشەکا قەیراناوی و پر خراب دا دەربازدبیت و ھەمی سێکتەرێن گرنگ بۆ ژیانێ بتایبەت سێکتەرێ تەندروستی و پەروەردە و ئابوری دخرابترین ئاست دانن و تانھا بەرپرسێن ئەڤی وەلاتی نەشیاینە ببنە نوینەرێن راستەقینە یێن خەلکێ و دەنگ و رەنگێ خەلکێ بن و دویر ژبەرژەوەندیێن حزبی و تاکە کەسی کاربکەن ژبوی پێشخستنا ئەڤان سێکتەرا ، 
ئەڤەژی جھێ کارەساتێ یە بومە وەک خەلکەکێ نەھوشیار ددەستێ ئەڤێ دەستھەلاتا بھەمی ڕامانان دیمۆکراسیەتێ وەک چەکەکێ بھێز بۆ بەرژەوەندیێن خوەیێن حزبی و تاکە کەسی بکاردئینت ،
چجاران سیستەمێ دیمۆکراسی ددەستێ دوو ھێزێن ناکوک و خوەدی چەک دا نابیتە ئالاڤێ گەھاندنا نانی بۆ ھاولاتیان .
یاھەری گرنگ و فەر ئەوە خەلک دچەوانیا ھەڵبژارتن و سەرەدەری و برێڤەبرنا وەلاتی دا چاڤ ڤەکری و ھوشیاربن و ھەرتشتی بێخن بەر ھەلسەنگاندنێ و پسیارێ و جادەیا کوردی بھێز و کودەنگ بکەن ، داکو دەستھەلات وێ ھزرێ نەکەت مللەت کەرەکێ پەزیە و بدلێ خوە شڤانیێ لسەر بکەت .