سەرنووچە:

ئەرێ دێ چالدێران دووبارە بیت؟!

3/10/2019 10:25:33 AM
6686 جار خوێندراوەتەوە
عیماد ئالیخان
+ -

تورکیا و ئیران دێ ئۆپەراسیونەکا ھاوبەش کەنە سەر پەکەکێ ژبۆ ژناڤبرنا وێ و نوکە ھەماھەنگی دناڤبەرا وان وەلاتاندا ھەیە ل سەر ڤی بابەتی،
ئەڤ چەندە وەزیرێ ناڤخۆ یێ تورکیا ل رۆژا چوارشەمبیا بووری بۆ دەزگەھێن راگەھاندنێ یێن وی وەلاتی دیارکربوو.
 وەسا دیارە ژ ئەنجامێ ئەڤێ ئۆپەراسیۆنێ دێ بارۆدوخێ دەڤەرێ و ب تایبەت سنورێن دناڤبەرا ھەرسێ وەلاتان دا ئالوز بیت، و زەرەرمەندێ سەرەکی دێ خەلکێ ئاکنجیێن سەرسنوران بن، ژبەرکو دێ دەڤەرێن وان بنە مەیدانێن شەرێن وان و دووبارە ئەو جھە دێ ھێنە چولکرن ژلایێ خەلکێ وان ڤە و زیانێن ئابوورێ و جڤاکی و ... ھتد دێ سەرھلدەن و پەیدابن.

 گەلەک بنگەھێن ڤێ ھێزا چەکداری ل باشورێ کوردستانێ ژی ھەنە! لەوا  ب دیتنا من ئەڤان ھەردو وەلاتان ھندەک مەرەمێن دی ھەنە ل پشت ئەڤێ ئۆپەراسیونێ و ئارمانجا وان یا سەرەکی نە ژناڤبرنا پەکەکێ یە، بەلکو وەک دیار بارۆدوخێ ھەرێمێ ژ ھەموو لایەکی ڤە بۆ نموونە ئابووری، سیاسی و ... ھتد بەرەڤ باشیێ دچن و ئەڤ چەندە بۆ ھەردو وەلاتان جھێ نەئارامیێ یە و بەردەوام حەز دکەن دەڤەر ژ ھەموو لایەکی ڤە یا ئالۆز بیت، ئەڤجا ب ئەڤێ رێککەفتنێ ئەوا دناڤبەرا وان دا دێ زیانێ گەھیننە باشوری ب رەنگەکێ گشتی!
لەوا دڤێت حکومەتا ھەرێما کوردستانێ ھەلویست ھەبیت بەرامبەر ڤێ ئوپەراسیونێ و نەھێلیت زێدەتر خەلکێ سفیلی باشورێ کوردستانێ و ب تایبەت ئەوێن ل سەر خالێن سنوری ببنە قوربانیێن ئالۆزیێن دناڤبەرا وان دا و دەڤەر و ئاخا مە نەبیتە مەیدانا شەرێن وان! و ئەڤ چەندە ببیتە جھێ تێکچوونا ئەمن و پاراستنا ئاسایشا دەڤەرێ، ژبەرکو چەندین سالە خەلکی سڤیلێ باشورێ کوردستانێ ب ھەموو رەنگەکی دبنە قوربانیێن شەرێن دناڤبەرا پەکەکێ و توپخانێن ھەردو دەولەتان دا و رێژەکا مەزن یا خەلکی گیانێ خوە ژدەست داینە  سەرەرای ژ دەستدانا ملک و مال و ... ھتد، و چەندین گوندێن سنوری دناڤبەرا ھەرسێ وەلاتان دا ئەڤە بۆ ماوێ چەندین سالانە بووینە دەڤەرێن قەدەغەکری و ھاتینە چولکرن ژ لایێ خەلکێ ئاکنجیێن وان گوندان ڤە.
باشترە حکومەتا ھەرێما کوردستانێ رێکێ نەدەتە ڤان ھەردو وەلاتان کو زێدەتر زیان ب ئاخ و گیانێن ھاولاتیێن ئاکنجیێن وان دەڤەران بکەڤیت ئەوێن ل سەر سنوران، ژبەرکو قوربانیێن سەرەکی ژ ھەر شەر و ئالوزیان خەلکێ وان دەڤەرانە.
دیارە ھەردو وەلاتان ژ ئەڤێ ئۆپەراسیۆنێ مەرەمێن سیاسی، ئابووری و ... ھتد یێن ھەین، ئەگەر نە، بۆچی ئەڤە چەندین سالە پەکەکە د ناڤا ئاخا رۆژھەلات، باکورێ و باشورێ کوردستانێ دا ھەین و ھەردو وەلات بەردەوام گوندێن سنوری و خەلکێ سڤیل دکەنە ئارمانجا توپخانێن خوە؟! ئەگەر مەرەما ڤان ھەردو وەلاتان ژ ئەڤێ ئۆپەراسیۆنێ بتنێ سنورێ دناڤبەرا وان دا بیت، ئانکو  بتنێ دناڤبەرا رۆژھەلات و باکورێ کوردستانێ دابیت، ل وی دەمی دێ بارۆدوخ ل باشورێ کوردستانێ ئالوزتر لێھێت ژبەرکو پەکەکە دێ ھێزا خوە ھەموویێ ژ رۆژھەلات و باکوری ڤەکێشیتە باشورێ کوردستانێ و دێ دەلیڤە خوشتر لێھێت کو ھەردو وەلات بەردەوام سنورێ باشورێ کوردستانێ تۆپبارانبکەن ب ھێجەتا ھەبوون پەکەکێ!  بۆچی ھەردەمێ بارۆدوخێ ھەرێمێ بەرەڤ باشیێ دچیت دۆژمنێن مە ھەولا تێکدانا دەڤەرێ دکەن؟!
ب ھێجەتا ھەبوونا پەکەکێ و پارتێن کوردی ب تایبەت ل رۆژھەلات، باشورێ و باکورێ کوردستانێ بەردەوام سنورێن کوردستانێ دھێنە توپبارانکرن و رێژەکا مەزن یا ئاخا سەر سنورێ دناڤبەرا ڤان ھەر سێ وەلاتان دا ھاتیە چولکرین ژلایێ خەلکێ ئاکنجیێن وان ڤە ژ ترسا تۆپبارانکرنێ و ژ دەستدانا گیانی.