سەرنووچە:

بازرگانیکرن ب دەرمانێن سەختە

9/24/2019 12:38:14 PM
5814 جار خوێندراوەتەوە
ڕامین دهۆکی
+ -

ئەو بازرگانیا پتر ژ مادێن بێھوشکەر و چەکی زیانێ دگەھینیتە مرۆڤان و تا نوکە ھیچ رێگریەکا سەرکەفتی یان سزایەکێ دژوار بۆ نەھاتیە دانان.

ئەڤ جورە بازرگانیە ژلایێ دەستەیێن مافیایی یێن گەلەک مەزن و کومپانیێن نەحکومی ڤە, ھەروەسا بەرپرسێن گەندەل دناڤ حکومەتێدا یان ئەو نوژدارێن حەزا بدەستڤەئینانا پارەی ھەی یان ئەو دەرمانسازیێن بەلگەناما رێ پێدایی ھەی بۆ فروتنا دەرمانێن یاسایی و کارکرنا وان بەروڤاژی, دھێتە برێڤەبرن, رادبن ب دروستکرنا دەرمانێن سەختە ژبۆو بدەستڤەئینانا برەکا زورا ماددی.

ھەروەسا دھێتە برێڤە برن ژلایێ ھندەک وەلاتان ڤە ل دژی وەلاتێن دی ژلایێ سیاسی ڤە بۆ نمونە سعودی ئێک ژوان وەلاتان کو بلندترین رێژا دەرمانێن سەختە دروستدکەت و برێکێن یاسایی و نە یاسایی دھنێریتە یەمەن وەک تولڤەکرنەکا سیاسی, دروستکرنا دەرمانێن سەختە و ھنارتنا وان بۆ دوژمنێ خۆ برێکەکا چاڤ نقاندی.

بۆچی مرۆڤ نەشێت پتریا ڤان دەرمانێن سەختە دگەل یێن یاسایی ژێک جودا بکەت؟

دەستەیێن مافیایی پتریا جاران بۆ کارکرنا خۆ و دروستکرنا دەرمانێن سەختە رادبن ب دزینا لوگویێ وان کومپانیێن پێشکەفتی یێن دەرمانێن یاسایی دروست دکەن, و دانانا وان لوگویان لسەر پاکیتێن دەرمانێن سەختە یێن ھاتینە دروستکرن.

زوربەیا جاران دەستەیێن مافیایی ئوپەراسیونێن چەکداری ئەنجامددەن لدەمێ ڤەگوھاستنا دەرمانێن یاسایی ژ کومپانیێ بۆ وەلاتەکێ یان باژێرەکێ, پشتی دەست بسەر داگرتنا وان بارھەلگرێن دەرمانێن یاسایی تێدا, پاکیتێن وان کومدکەن و بۆ دەرمانێن سەختە بکاردئینن.

بازارێ ئونلاین مفایەکێ زور گەھاندیە وان کەسان یێن ڤی جورێ بازرگانیێ دکەن. ھندەک ژوان خاپاندنێن بازرگانی یێن برێکا ئونلاین دھێنە کرن, رێکلاما ئونلاین بۆو دەرمانێن گیایی کو پێکھاتینە ژ گیایی و مفایەکێ زور ھەیە, د راستیدا ھوسا نینە, رێکلاما دەرمانێن لاوازیا سێکسی ئەڤەژی زوربەیا کەسان ڤان جورە دەرمانان بکاردئینن بۆو گەشەکرنا مرۆڤی ژلایێ سێکسیڤە وەکی زێدەکرنا حەزێ و دەمدرێژیا وێ کریارێ, بێی ئاگەھی ژ دەرمانی کو یێ سەختەیە و رادبیت ب پەیدا کرنا ھندەک ئێشێن دی وەکی نەزوکبۆنا مرۆڤی بەروڤاژی زێدەکرنا حەزێ, ب بۆرینا دەمی دبیتە ئەگەرێ کێمبۆونا حەزێ, و دەرمانێن لەش جوانی وەکی کرێم و کەپسولان, ئەڤ ڤەکولینە ژ لایێ رێکخراوا تەندروستیا جیھانیڤە ھاتینە کرن,  دەستھەلاتدارێن گومرکا ئەمریکا باشور ھوسا دایە دیارکرن کو روژانە ھزار بازرگانێن دەرمانێن سەختە مژیلی ھنارتنا دەرمانانە ب رێکا ئونلاین بۆ وەلاتێن ئاسیا.

ھەروەسا د خالەکا دی دا کو ژ لایێ رێکخراوا تەندروستیا جیھانیڤە ھاتیە بەلافکرن, دەرمانێن سەختە ھەمی دەما دروستکری نینن, بەلکو زوربەیا جاران ئەو دەرمانێن مێژوویا وان بسەرڤەچوی دھێنە گوھرین بۆو ناف ھندەک پاکیتێن دی ب مێژویەکا سەختە, یان ژی ئەو دەرمانێن دھێنە دروستکرن پێکھاتەیەکێ (نەفت)ێ بخۆڤەدگریت.

زوربەیا دەرمانێن سەختە ل ھندستانێ دھێنە دروستکرن, ب رێژا ٧٥% دەرمانێن سەختە یێن ڤی وەلاتی دگەھنە جیھانێ, وەلاتێ ھیندستانێ ب رێژا ئێکێ دھێت ل جیھانێ ب چێکرنا دەرمانێن سەختە, ل دویڤدا روسیا دھێت کو ب رێژا ١٢% دەرمانێن خۆ یێن سەختە دھنێریتە جیھانێ.

ئێک ژ ھوکارێن سەرەکی کو رێکێ ل کونترولکرنا بازرگانیا دەرمانێن سەختە دگریت, رەوشا سیاسیا نە جێگیرە بۆو نمونە وەلاتێن لیبیا, یەمەن, عێراق, سوریا ...ھتد ئەڤ رەوشە یا شیایی زەربەکا مەزن ل وان یاسایا بدەت یێن دژی بازرگانیا دەرمانێن سەختە دھێنە سەپاندن.

قەبارێ داھاتێ دەرمانێن سەختە گەلەک ژ داھاتێ ماددێن بێھوشکەر زێدەترە, بۆ نمونە سالانە بلندترین رێژا داھاتێ ماددێن بێھوشکەر ھاتبیتە تومارکرن ٢٠ بۆ ٤٠ ملیارا یە, و سزایێ بازرگانێ ماددێن بێھوشکەر ٤٠ سالا زیندانکرنە ل پتریا وەلاتێن جیھانی.

داھاتێ بازرگانیکرنێ ب دەرمانێن سەختە سالانە گەھشتیە زێدەتر ژ ٢٠٠ ملیار دولاران, ھەروەسا ل ئەمریکا لاتین قازانجێ دەرمانێن سەختە سێ جاران ژ یا دەرمانێن یاسایی پترە, و د نوکەدا قەبارێ بازارێ دەرمانێن سەختە ل عێراقێ سالانە دگەھیتە ئێک ملیون دولاران, سالانە دەرمانخانێن بەغدا و باژێرێن دی یێن عێراقی پر دبن ژ دەرمانێن سەختە یێن ھندی و چینی.

سەرەرایی ھندێ سزایێ ڤێ بازرگانیا کوژەک بتنێ سالەک زیندانی و غرامەکرن ب کوژمەکێ پارەی, کو زیانێن وێ گەلەک زێدەترن ژ زیانێن ماددێن بێھوشکەر و روژانە دبیتە ئەگەرێ پەیدابۆونا چەندێن نەخۆشیێن کوژەک و مرنا سەددان مرۆڤا.