سەرنووچە:

بەریتانیایێ هەلویستێ خوە ل سەر ئۆپراسیۆنا چاڤەرێکریا تورکیا ل سوریایێ راگەهاند

فۆتۆ: 
2019-01-20

788 جار خوێندراوەتەوە

حکومەتا بەریتانیایێ هەلویستێ خوە ل سەر ئۆپراسیۆنا چاڤەرێکریا تورکیایێ بۆ سەر سوریایێ راگەهاند وئاماژە ب وێ یەکێ کر د گەل هەڤپەیمانێن خوە دێ د پەیوەندیێ دابن.

ئیدوین سموئیل پەیڤدارێ حکومەتا بریتانیایێ ل رۆژهەلاتا ناڤەراست و باکورێ ئەفریقیایێ د تۆمارەکا ڤیدیۆیی دا د رۆپەلا خوەیا تورا جڤاکیا تویتەرێ دا ئەڤرۆ شەمبێ ١٩ێ چلەیا ٢٠١٩ێ راگەهاند، بەریتانیا د گەل هەڤپەیمانێن خوە ب تایبەتى تورکیا و ئەمریکایێ دێ د پەیوەندیێ دابە پێخەمەت پاراستنا هێزێن کوردى و هێزێن ئۆپۆزسیۆنێ ل رۆژئاڤایێ سوریایێ.

گوتنێن وى بەرپرسێ حکومەتا بەریتانیایێ د دەمەکێ دانە، ئەنقەرە د ئامادەباشیێ دایە بۆ دەستپێکرنا ئۆپراسیۆنەکا سەربازى ل باکورێ رۆژهەلاتا سوریایێ ب ئامرمانجا رووبروو بوونێ دگەل هێزێن کوردى ل دەڤەرێ کو حکومەتا تورکیایێ ب تیرۆرست ل قەلەم ددە.

تورکیا دخوازە ب مفا وەرگرتن ژ ڤەکشینا هێزێن ئەمریکایێ ل سورسایێ د چەند مەهێن داهاتى دا ئۆپراسیۆنا خوە بۆ سەر باکورێ سوریایێ دەست پێ بکەت.

دوهى ژى برێت مەکگۆرک نونەرێ بەرێ یێ سەرۆکێ ئەمریکایێ بۆ شەرێ داعشێ ل سوریا و عێراقێ راگەهاند، بریارا ڤەکشینا هێزێن ئەمریکایێ ل سوریایێ شاشیەکا کارەساتبارە و دوژمنێن واشنتۆنێ دێ وێ ڤالاتیێ تژى کەن و دێ بیتە سەدەم کو هزاران ب وەلاتیێن کورد و مەسیحى ئاوارەبن.

برێت مەکگۆرک وەها دبینە داخوازیا دۆنالد ترەمپ بۆ دانانا پلانا ڤەکشاندنا هێزێن وەلاتێ خوە ل سوریایێ " گەمژانەیە" ل سایەیا نەبوونا چ هەلسەنگاندنێن هور بۆ مەترسیان، کو پشتى ڤەکشینا هێزێن ئەمریکایێ ل سوریایێ پەیدا دبن و ڤەکولینەکا هور بۆ سوریا و داعشێ نەبوویە.

م.س