سەرنووچە:

حکومەتا هەرێمێ دەربارەی پارڤەکرنا مووچەی زەلالکرنەک دا

فۆتۆ: 
2020-03-26

2603 جار خوێندراوەتەوە

پەیڤدارێ حکومەتا هەرێمێ ڕاگەهاند، بۆ پارڤەکرنا مووچەی چاڤەڕێی پارەیێ بەغدا دکەن و هەردەما گەهشت دێ ب میکانیزمەکێ کو ڕێنمایێن ساخلەمیێ بەڕچاڤ بگرن دەست ب پارڤەکرنا مووچەیێ تەڤاهیا وەزارەتان کەن.

جوتیار عادل پەیڤدارێ حکومەتا هەرێمێ د ڕگەهاندنەکێ دا دیارکر، "وەزارەتێن (پێشمەرگە، ساخلەمی، دارایی و ئابوری، ناڤخۆ) مووچە وەرگرتنە و کۆژمێ پێدڤی ل داهاتێ هەرێمێ هاتبوو دابین کرن".

دیارکریە ژی، "ژبەر ڤێ ڕەوشا ساخلەمیێ و ڕاگرتنا دەوامێ ل بەغدا، هاتنا ڤی تەمویلی پاشداکەفتیە، بۆ وێ مەرەمێ ژی وەزیرێ دارایی و ئابوریا هەرێمێ د پەیوەندیا بەردەوام دایە دگەل وەزارەتا داراییا حکومەتا فیدرال بۆ چارەسەرکرنا وێ ئاریشەیێ".

ئەو یەک ژی دایەزانین، "تەڤاهیا مووچەیێ مووچەخۆران بۆ هەر مەهەکی د هەرێما کوردستانێ دا پێکدهێت ژ ٨٩٤ ملیار دیناران، ژ وی کۆژمی ژی ٤٥٣ ملیا دینار ل بەغدا دهێتە تەمویلکرن، کو دکەتە ٥١٪ یا پارەیێ پێدڤی بۆ پارڤەکرنا مووچەی".

پەیڤدارێ حکومەتا هەرێمێ بەحسا وێ یەکێ ژی کریە، "ئەڤرۆ ڕۆژا وێ یەکێ یە کو هەموو تاکێن جڤاکێ هەڤکارێن هەڤدوو بین هەیا کو هەموو پێکڤە بسەر مەترسیا ڤی پەتایێ و باندۆریێن وێ سەربکەڤین".

ئەڤە ژی دەمەکێ دایە، بڕیاربوو پشتی پارڤەکرنا مووچەیێ وەزارەتا ساخلەمیێ مووچەیێ مەها ١٢ یا سالا دەربازبووی یێ وەزارەتا پەروەردێ بهێتە پارڤەکرن، لێ هەیا نها نەهاتیە پارڤەکرن.

س.م