سەرنووچە:

فراکسیۆنا نەوەی نوێ: زێدەباری داخوازکرنێ بۆ دوویەم جار سەرۆکاتیا پەرلەمانی فۆرما رەتکرنا خانەنشینیێ ب مە نەدا

فۆتۆ: 
2020-02-26

233 جار خوێندراوەتەوە

فراکسیۆنا نەوەی نوێ ڕاگەهاند، زێدەباری کو ئەڤە بۆ دوویەم جارە داخۆازا فۆرما رەتکرنا خانەنشینیێ دکەین، لێ سەرۆکاتیا پەرلەمانی فۆرمێن مە نادەت.

کازم فاروق سەرۆکێ فراکسیۆنا نەوەى نوێ د فەیسبووکێ خۆ دا بەلاڤکریە، "وەک بەریا نها مە سۆزدابوو، پشتی دەرچوونا یاسایا چاکسازیێ و بەلاڤبوونێ د رۆژنامەیا فەرمی یا وەقایع یا کوردستانێ دا ل بەروارا ٢٠٢٠/٢/٦، بۆ جارا دوویەم دگەل هەڤالێن خۆ مە داخۆاز پێشکەشکر بۆ رەتکرنا خانەنشینیێ و مە داخۆاز کر فۆرمێن مە بدەن و دەملدەست رێکارێن تایبەت بۆ رەتکرنا خانەنشینیا مە بۆ مە بهێن ئەنجامدان".

هەروەسا نڤیسیە "ئەڤە نە منەتە و نە وێرەکیە، بەلکو مەبدەئێ مە و ڤەلڤینا مەیە کو ب نێرینا مە خانەنشینیا پلەبلندان نەعەدالەتیە و دڤێت نەمینیت، دەستپێکێ ژی مە ژ خۆ دەستپێکر".

ناڤبری ڕاگەهاندیە ژی، "لێ ئەڤا کو سەیرە ئەوە زێدەباری کو دووجارە دگەل هەڤالێن خۆ ب نڤیسارا فەرمی داخوازێ دکەین فۆرما رەتکرنا خانەنشینیا مە بدەنەڤە لێ سەرۆکاتیا پەرلەمانی فۆرمێن مە نادەت، د دەمەکێ دا زێدەتری ٢٠ رۆژانە یاسا ب فەرمی دەرچوویە و ل رۆژنامەیا وەقایع یا کوردستانێ هاتیە بەلاڤکرن ".

د داویێ دا نڤیسیە "دێ دگەل هەڤالێن خۆ یێن فراکسیۆنان و د ڤەلڤینێ ژی دا سۆزێ دەین، ب پشتەڤانیا خودێ و ھاڤکاری و دلسۆزیا خەلکی لسەر سۆزێن خۆ بەردەوام بین و د داھاتی دا زێدەتر و توندتر دژایەتیا گەندەلی و نەعەدالەتی و زولم و ستەمێ کەین".