سەرنووچە:

تورکیا و پاکستان دەرازینکێن سنوریێن خۆ دگەل ئیرانێ داخستن

فۆتۆ: 
2020-02-23

240 جار خوێندراوەتەوە

ژبەر بەلاڤبوونا ڤایرۆسا کۆرۆنایێ، هەر یەک ژ ولاتێن تورکیا و پاکستان دەرازینکێن سنوریێن خۆ  ب ئاوایەکێ دەمکی دگەل ئیرانێ داخستن.

فەخرەدین کۆجا وەزیرێ ساخلەمیا تورکیا ڕاگەهاند، "ژبلی دەرازینکێن سنوری، ژ دەمژمێر هەشتێ ئەڤشەڤە ڤە تەڤاهیا ئەو گەشتێن ئەسمانیێن ناڤدەولەتی کو ل ئیرانێ دهێن دێ هەلاویسن".

گوت ژی، ژبەر هەبوونا چەند نیشانەیێن کۆرۆناێ، ڕێگری ژ هاتنەناڤا هەشت گەشتیارێن ئیرانی کرینە بۆ ناڤ تورکیا.

دەربارەی تۆمارکرنا چەند تووشبوویێن کۆرۆنایێ ل تورکیا، فەخرەدین کۆجا گوت، "پێنج کەسل باژاڕێ وانێ کو نیشانەیێن ئەنفلۆزایێ لێ دەرکەفتنە دبن چاڤدێریێ دا هاتبوون دانان و ئەنجامێ پشکنینان نێگەتیڤ دەرچوونە ژ ڕوویێ هەبوونا ڤایرۆسا کۆرۆنایێ".

هەڤدەم هەر ژبەر بەلاڤبوونا ڤایرۆسا کۆرۆنایێ حکومەتا پاکستانێ ژی سنورێن خۆ دگەل ئیرانێ داخستن، پێشتر ژی هەریەک ژ عێراق و سعودیێ سنورێن خۆ لهەمبەر وی ولاتی داخستن.

ئەڤە ژی د دەمەکێ دایە، لگۆری ئامارێن هەری نوو هەیا نها هەژمارا وان کەسێن ب ڤایرۆسا کۆرۆنایێ ل چینێ جانێ خوە ژ دەست دانە بۆ دوو هزار و ٤٤٢ کەسان و هەژمارا تۆشبوویان ژی بۆ ٧٩ هزار و ٩٣٦ کەسان بلندبوویە.

س.م