سەرنووچە:

دهۆک.. سێ جهـ ژبەر گران فرۆتنا دەمامکان هاتن داخستن

ڕێکارێن ڕێگریکرن ژ بەلاڤبوونا کۆرۆنایێ
فۆتۆ: 
2020-02-23

1653 جار خوێندراوەتەوە

لیژنەیا قائیمقامیا قەزا دھۆک سێ جھـ ژبەر گران فرۆتنا دەمامکان داخستن و ساخلەمیا دھۆکێ ژی ڕاگەھاند، ھەر کەس و پەیجەک دەنگۆیێن نەڕاست دەربارەی ڤایرۆسا کۆرۆنا ل سنورێ وێ پارێزگەھێ بەلاڤ بکەت، دێ ڕێکارێن یاسای لھەمبەر گرنەبەر.

 بڕیار نێروەی نووچەگەھانێ دیجیتال میدیایا ئێن ئاڕ تی ل دھۆکێ ڕاگەھاند، لیژنەیا دیڤداچوونا بازاری یا قائیمقامیا قەزا دھۆک دەست ب لێگەڕیان و پشکنینان کرینە بۆ وان جھێن کو بھایێ کەلوپەلێن نۆژداری و ب تایبەت ژی دەمامک گران دکەن، د وی کڤانی ژی دا ئەڤرۆ سێ جھـ داخستن.

دیارکر ژی، ئەو سێ جھە پێکدھاتن ژ دەرمانخانە و کۆگەھێن دەرمانان کو زێدەگاڤی لسەر بھایێ دەمامکان کربوون و گرانکربوون و لیژنەیێ ژی بڕیارا داخستنێ بۆ دەرکر.

ھەڤدەم ئەڤرۆ ئاراس مستەفا نۆژدارێ ئەندام د لیژنەیا قائیمقامیا قەزا دھۆک دا بۆ ئێن ئاڕ تی گوت، ژبەر بەلاڤبوونا ڤایرۆسا کۆرۆنایێ ل ولاتێن ھەڤسنور، خواست لسەر دەمامکان زێدەبوویە و ھند جھێن فرۆتنا وان ژی ئەڤ یەک ب دەرفەت زانیە و بھا گرانکرنە.

دازانین ژی، لیژنەیا دیڤداچوونا بازاری ب ھووری دەست ب لێگەڕیان و پشکنینان کریە و پێشتر ژی تەڤاھیا دەرمانخانە و جھێن فرۆتنا کەرستێن نۆژداری ئاگەھدارکرنە، ھەر جھەک دەمامکان گران بکەت دێ پێرابوونان د دەرھەق دا وەرگرن و سزادەن.

ژ ئالیەکێ دی ڤە، ئەڤرۆ ڕێڤەریا گشتیییا ساخلەمیا دھۆکێ د کۆنفرانسەکا ڕۆژنامەڤانی دا ڕاگەھاند، ھەیا نھا چ حالەت و گۆمانلێکرنەکا ڤایرۆسا کۆرۆنایێ ل سنورێ پارێزگەھا دھۆکێ نەھاتنە تۆمارکرن، ھەر کەس و پەیجەک ژی دەنگۆیێن نەڕاست بەلاڤ بکەت، دێ ڕێکارێن یاسای لھەمبەر گرنەبەر، وان ژی بەرھەڤیێن خۆ ب تەمامی کرنە بۆ ھەر پێشھاتەکا نوو.

س.م