سەرنووچە:

پەکەکە: دەڤەرا کو تورکیا ل ئاکرێ بۆمبەبارانکری گەریلا لێنەبوون

فۆتۆ: 
2020-01-29

540 جار خوێندراوەتەوە

ناڤەندا ڕاگەهاندن و چاپەمەنیا هێزێن پاراستنا گەل ڕاگەهاند، دەولەتا تورکیا ب ئاوایەکێ سیستەماتیک وەلاتیێن سڤیل ل باشورێ کوردستانێ دکەتە ئارمانج، دەڤەرا کو ل ئاکرێ ژی هاتی بۆمبەبارانکرن گەریلا لێنەبوون.

ناڤەندا ڕاگەهاندن و چاپەمەنیا هێزێن پاراستنا گەل – هەپەگە، بالێ لەشکەریێ "پەکەکێ"، دەربارەی ب ئارمانجگرتنا وەلاتیێن سڤیل ل باشورێ کوردستانێ ژ ئالیێ بالەفرێن تورکیا ڤە ڕاگەهاندنەک بەلاڤکر و دازانین، ڕۆژێن ٢٦ و ٢٧ێ ڤێ مەهێ ئارتێشا تورکیا ب بالەفرێن بێ بالەفرڤان گوندێ چەمشرێتک و چیایێ زێبارێ ل قەزا ئاکرێ بۆمبەبارانکرن و ب وێ سەدەمێ ژی وەلاتیەک شەهیدبوو و یەکێ دی ژی ب گرانی برینداربوو.

ئەو یەک ژی دازانین، پلانا تورکیا داگیرکرنا باشورە، ژبەر ڤێ یەکێ ژی ب ئاوایەکێ هوڤانە هێرشی سەر وەلاتیان دکەت، ب ئەنقەست دەڤەرێن سڤیلان بۆمبەباران دکەت.

بەحسا وێ یەکێ ژی کریە، کو ئارتێشا تورکیا ب هێجەتا هەبوونا پەکەکێ بۆمبەبارانان دکەت، دەمەکێ دا ئەو دەڤەرێن کو ل ئاکرێ هاتینە بۆمبەبارانکرن چ گەریلایێن وان لێنەبوونە.

د داویا ڕاگەهاندنا خۆ دا هەپەگێ گوتیە، دێ تولا شەهید و بریندارێن سڤیل ژ ئارتێشا تورکیا ڤەکەن.

ڕۆژا ٢٦ێ ڤێ مەهێ ئارتێشا تورکیا ب بالەفرێن بێ بالەفرڤان هەژمارەک گوند ل دەڤەرا زێبارێ یا سەر ب ناحیەیا دینارتە ل سنورێ قەزا ئاکرێ بۆمبەبارانکرن، د ئەنجامێ دا وەلاتیەکێ سڤیل شەهیدبوو و یەکێ دی ژی برینداربوو، چار وەلاتیێن دی ژی ژبەر بەردەوام بۆمبەبارانان بۆ دەما دوو ڕۆژان ل وان دەڤەران ئاسێمابوون، کو تەڤاهیا وان بۆ سەخبێریکرنا ڕەزێن خۆ چووبوون.

س.م