سەرنووچە:

چین.. د ١٠ ڕۆژان دا دێ نەخۆشخانەیەکا هزار تەختی بۆ تووشبوویێن ڤایرۆسا کۆرۆنا هێتە دروستکرن

فۆتۆ: 
2020-01-24

247 جار خوێندراوەتەوە

دەستهەلاتدارێن چینێ ڕاگەهاندن، دێ د دەما ١٠ ڕۆژان دا نەخۆشخانەیەکا تایبەت ب چارەسەرکرنا تووشبوویێن ڤایرۆسا کۆرۆنا لسەر ڕووبەرێ ٢٥ هزار مەترێن چارگۆشە دروست کەن.

دەستهەلاتدارێن چینێ دیارکرنە، "ژ پێخەمەت چارەسەرکرنا نەخۆشێن هەلگرێن ڤایرۆسا کۆرۆنایێ، دێ نەخۆشخانەیەکا هزار تەختی بۆ ڕووبڕووبوونا وێ ڤایرۆسێ لسەر ڕووبەرێ ٢٥ هزار مەترێن چارگۆشە دروست کەن"، دەمەکێ دا ل سالا ٢٠٠٣ێ ولاتێ چینێ د دروستکرنا نەخۆشخانەیەکێ دا ل پەکینێ بۆ تووشبوویێن ڤایرۆسا سار ڕیکۆردا دروستکرنێ شکاند.

هەڤدەم جڤاتا ساخلەمیا نیشتیمانیا ولاتێ چینێ ڕاگەهاند، ٨٣٠ کەس تووشی نەخۆشیا کۆرۆنا بوونە و ب وێ سەدەمێ ژی ٢٦ کەسان ژیانا خۆ ژ دەستدانە و ل چەند دەڤەران ژی دەواما خواندنگەهان هاتیە ڕاگرتن.

بەحسا وێ یەکێ ژی کریە، ڕەوشا ساخلەمیا ١٧٧ تووشبوویان ژ کۆما تووشبوویێن نەخۆشیێ یا دژوارە، ٢٤ کەسێن کو ژبەر وێ نەخۆشیێ ژیانا خۆ ژ دەستدانە ل ویلایەتا هوبەی بوونە.

هەڤدەم هەشت هزار و ٤٢٠ کەس دبن چاڤدێریا نۆژداری دا هاتینە دانان، ژبەر وێ یەکێ کو پەیوەندی ب وان کەسان ڤە هەبوونە کو تووشی نەخۆشیێن ببوون.

ل هەژمارەکا باژاڕێن چینێ ژی ب ئاوایەکێ دەمکی گەشتێن پەژایی و دەریایی هاتنە هەلاویستن، ل هند باژاڕێن دی ژی ژبلی وێستگەهێن سوتەمەنیێ، نەخۆشخانە و دەرمانخانەیان، کارکرن د سازیان دا هاتیە ڕاگرتن.

بۆ ڕێگریکرن ژ زێدەتر بەربەلاڤبوونا نەخۆشیێ ژی وەزارەتا داراییا چینێ، کۆژمێ ١٤٤ ملیۆن دۆلاران تەرخانکرنە.

ڤایرۆسا کۆرۆنا تووشی کۆئەندامێ هەناسەدانا مرۆڤان و گیانداران دبیت، ب گوتنا شارەزایان ئەو ڤایرۆسە وەک نەخۆشی تووشی زارۆک و مەزنان ژی دبیت، ڤایرۆس ب ڕێیا کۆخین و بێنشین و هەوای بەلاڤ دبیت و یەکە ژ ڤایرۆسێن کۆژەک، ئەڤ جۆرێ ڤایرۆسێ زێدەتر و ب تایبەت د وەرزێ زڤستانێ دا بەلاڤ دبیت.

س.م