سەرنووچە:

پەڕلەمانتارەکێ نەوەێ نوێ: پێدڤیە د پرۆژە یاسایا چاکسازیێ دا خانەنشینیا پلە بلندان نەمینیت

فۆتۆ: 
2019-12-11

255 جار خوێندراوەتەوە

پەرلەمانتارەکێ فراکسیۆنا نەوەى نوێ ل پەرلەمانێ کوردستانێ راگەهاند، فراکسیۆنا وی تەکەز لسەر نەمانا خانەنشینیا پلە بلندان و چەند خالێن دی دەکەت، کو پێدڤیە د پرۆژە یاسایا چاکسازیێ دا بهێتە دیارکرن.

کاوە عەبولقادرد پەیجێ خۆ ژ تۆڕا جڤاکیا فەیسبوکێ نڤیسایە، ئەم وەک فراکسیۆنا نەوەی نوێ تەکەز لسەر ٣ خالان دکەین و پێدڤیە د ناڤ پرۆژە یاسایێ دا جهـ تێدا بۆ بهێتە ڤەکرن کو یەک ئەڤەیە، " نابیت کێمترین موچەیێ خانەنشینێ ژ ٥٠٠ هزار دیناران کێمتر بیت".

بەحسا وێ یەکێ ژی کر، خانەنشینێن پلە بلند وەک ((سەرۆکێ ھەرێمێ و جێگرێن وی، سەرۆکێ حکومەت و جێگرێن وی، وەزیران، سەرۆکایەتیا پەرلەمانی و ئەندامێن پەرلەمانی و بریکارێ وەزیر و شێوەرمەند و ئەندامێن جڤاتا دادوەری و ڕێڤەبەرێن گشتی و پلەیێن یەکان وهەڤئاوایێن وان) نەمینیت، یان ب ڕێژەیەکا باش بهێتە کێمکرن ب ئاوایەکێ کو جودایەکا وەسا دگەل فەرمانبەرێن ئاسای نەبیت، ب ئاوایەکێ باوەرنامە و تەمەن و سالێن خزمەت  و زارۆکان بهێتە کرن، هەر کەسەکی ژی تەمەنێ یاسای تەمام نەکربیت بهێتە خانەنشین کرن.

فراکسیۆنا نەوەی نوێ تەکەز لسەر هەلوەشاندنا تەڤایا خانەنشینێن نەیاسای کر و ڕاگەهاند، " چەندین سالە ب نەیاسایی و بێی چ بنەمایەکێ هاتنە خانەنیشینکرن".

دایەزانین ژی، ژ بلی ڤان هەرسێ خالان پێدڤیە یاسایا چاکسازیێ داهات و بودجەی ژی ڤەگریت نەک تنێ خەرجیان.

ئەڤەژی د دەمەکێ دایە، کو ئەڤرۆ چارشەمبێ، جڤاتا وەزیرێن هەرێمێ جڤیا، د جڤینێ دا ژی ب کۆما دەنگان پڕۆژە یاسایا چاکسازیێ هاتە پەسەند کرن و بڕیارە ژی بۆ پەڕلەمانی بهێتە شاندن.

س.ع