سەرنووچە:

وەزارەتا بازرگانی: ٢٨ ملیار دینارێن پارەیێ گەنمێ جوتیاران دهێتە پارڤەکرن

هەیا نها دەمەکێ دیارکری نەهاتیە دانان
فۆتۆ: 
2019-11-18

377 جار خوێندراوەتەوە

ڕێڤەبەرێ گشتیێ بازرگانی یا وەزارەتا پیشەسازی ڕاگەهاند، ٢٨ ملیار دینارێن پارەیێ گەنمێ جوتیاران دهێتە پارڤەکرن.

نەوزاد ئەدهەم ڕێڤەبەرێ گشتیێ بازرگانی ژ وەزارەتا پیشەسازی و بازرگانیا هەرێمێ د داخویانیەکێ دا بۆ دیجیتال میدیایا ئێن ئاڕ تی ڕاگەهاند، چەکێ پارەیێن گەنمێ جوتیارێن هەرێمێ بەرهەڤە و کۆما کوژمێ پارەی ژی ٢٨ ملیار دینارە.

بەحسا وێ یەکێ ژی کر، " ژ وان ٢٨ ملیار دیناران، ٢٠ ملیار بۆ جوتیارێن سلێمانیێ یە، ٤ ملیار بۆ جوتیارێن هەولێر ێ و ٤ ملیار ژی بۆ جوتیارێن دهۆکێ یە".

دەربارەی پارڤەکرنا پارەی دیارکر ژی، " هەیا نها دەمەکێ دیاریکری نەهاتیە دانان پشتی تەمام بوونا هندەک ڕێوشونێن بانکیێن خۆ جوتیاران دێ ئاگەهدار کەین".

زەلالکر ژی، " ئەڤە داوی وەجبەیا پارەیێ گەنمێ سالا ٢٠١٩ێ یێ جوتیارانە، پشتی پارڤەکرنا ڤێ کوژمێ پارەی ژی، پرۆسەیا پارڤەکرنا گەنمێ جوتیاران دێ ب داوی ئێت".

ئەڤەژی د دەمەکێ دایە، د دەمێ دەربازبوویی دا ژبەر ئاریشەیێن ناڤبەرا بەغدا و هەرێمێ، پارەیێ گەنمێ جوتیاران بۆ چەند سالان هاتە گیرۆکرن و جوتیارێن هەرێمێ ژی چەندین جار بۆ وێ پرسێ خڕڤەبوون کرنە و داخوازا مافێن خۆ کرینە.

س.ع