سەرنووچە:

وەزارەتا نەفتا عێراقێ: خۆنیشاندانان باندۆری لسەر بەرهەم و شاندنا نەفتێ نەبوویە

فۆتۆ: 
2019-11-18

690 جار خوێندراوەتەوە

وەزارەتا نەفتا عێراقێ ڕاگەهاند، خۆنیشاندانێن باژاڕێن عێراقێ باندۆری لسەر ئاستێ بەرهەمئینان و شاندنا نەفتێ نەبوویە.

ئەڤرۆ دووشەمبێ، (١٨مژدارا ٢٠١٩ێ)، عاسم جیهاد، پەیڤدارێ وەزارەتا نەفتا عێراقێ بۆ کەنالا ئاڕ تی یا ڕوسی ڕاگەهاند، هەرچەندە بەشەک ژ کێلگەهێن نەفتێ یێن عێراقێ ل نێزیک وان باژاڕانە ئەوێن کو خۆنیشاندان تێدا دهێنە کرن، لێ خۆنیشاندانان باندۆری لسەر ئاستێ بەرهەمئینان و شاندنا نەفتێ نەبوویە.

بەحسا وێ یەکێ ژی کر، " ژ بلی داخستنا چەند ڕێیان کو بەرەڤ کێلگەهێن نەفتێ دچن، چ شتەکێ دی ڕوونەدایە و خۆنیشاندەر هشیارن و زەرەرێ ب کێلگەهێن نەفتێ ناگەهینن، ئەو تنێ داخوا ڕەخساندنا دەلیڤەیا کاری و خزمەتگوزاریان دکەن، ئەو ژی مافێ وانە".

ئەڤە ژی د دەمەکێ دایە، ئەڤرۆ خۆنیشاندەران ل باشورێ عێراقێ ڕێیا پێنج بەندەر و کێلگەهێن نەفتێ ل باشورێ عێراقێ داخستیە و ڕێ ژی ب کرێکارێن پارزینگەهێن کەربەلا نەدایە بچنە سەر کارێن خۆ.

هەڤدەم، خۆنیشاندەرێن بەسرە بەندەرا ئوم قەسر ل باشورێ وەلاتی گرتیە و، وێ یەکێ ژی باندۆری لسەر لهەڤگۆهەڕتنا بازرگانی ب  ڕێژەیا٥٠% دروستکریە.

لگۆڕەی ئاماران زێدەتر ژ ٣٠٠ خۆنیشاندەران ژ ئۆکتۆبەرا دەربازبووی هاتنە کوشتن و زێدەتری ١٥ هزار وەلاتیێن دی ژی برینداربوون، ب ڤێ یەکێ ژی پشتی ژ ناڤچوونا ڕژێما سەدام حسێنی، ئەڤە یەکەمین خۆنیشاندانا هۆسا مەزنە ل عێراقێ ڕوودابیت.

س.ع