سەرنووچە:

زێدەتر ژ مەهەکێ یە لسەر کەیسا نەوەى نوێ دادگەها ئاسایشێ بەرسڤا نڤیسەکا دادگەها پێداچوونا هەرێمێ نەدایە

فۆتۆ: 
2019-11-12

173 جار خوێندراوەتەوە

سەرۆکاتیا دادگەها پێداچوونا هەرێمێ ل هەولێر ، داخوازێ ل دادگەها ئاسایشێ دکەت کو دوسیەیا تایبەت ب ڤەلفینا نەوەى نوێ بۆ دادگەها وان بشینن ، لێ هەیا نها دادگەها ئاسایشێ بەرسڤا وان نەدایە.

لگۆر نڤیسەکێ کو دەست ئێن ئار تى کەتیە و هەژمار 1186ێ یا رۆژا 7/10/2019ێ لسەرە، دادگەها پێداچوونا هەرێمێ داخواز ل دادگەها ئاسایشێ کریە کو تەڤایا دەستپێکیێن بریارا تەمیزێ یا هەژمارە ٧٧٩/ب.ت/٢٠١٩ بۆ دادگەهێ بشینن، لێ پشتى دەربازبوونا زێدەتر ژ مەهەکێ بسەر وێ داخوازیێ دا ، هەیا نها دادگەها ئاسایشێ دوسیە بۆ دادگەها پێداچوونا هەرێمێ نەشاندیە.

ب باوەریا شارەزایێن یاسایى نە شاندنا دۆسیەیێ بۆ دادگەها پێداچوونێ ، زێدەبارى دەربازبوونا مەهەکێ بسەر داخوازیا وان دا ، ژبلى وێ یەکێ کو کارەکێ نەیاساییە ، هەڤدەم حساب نەکرنا دادگەهانە بۆ هەڤدوو  ، ژبەر کو دادگەها پێداچوونا هەرێمێ ، دادگەهەکا بلندترە و پێدڤیە ئەو نڤیسێن بۆ هەر دادگەهەکا دى دهێن شاندن ، ب زووترین دەم بهێن بەرسڤ دان.

د مەها گۆلانا ئەڤسال دا ب هێجەتا خراب بکارئینانا ئامیرەیێن پەیوەندیکرنێ ، چەند خوبەخشێن نەوەى نوێ ژ ئالیێ ئاسایشێ ڤە هاتن دەستەسەرکرن، ل دوویڤ دا لسەر هەمان بابەت ، سەرۆکێ ڤەلڤینا نەوەى نوێ ژى هات دەستەسەر کرن و پشتى کارڤەدانا ناڤخۆ و دەرڤە سەرۆکێ ڤەلڤینێ و خۆبەخشێن وێ ب کەفالەت هاتن ئازادکرن.

ئەڤە ژى دوویەم جارە کو دادگەهەکا بلندتر ل دادگەها ئاسایشێ داخوازا وێ دۆسیەیا نەوەى نوێ ل دادگەها ئاسایشێ دکەت لێ دادگەها ئاسایشیێ بەرسڤێ نادەت.