سەرنووچە:

​ئارتێشا تورکیا کاروانەکێ سڤیلان ل ڕێیا رەقا بۆ گرێ سپی کرنە ئارمانج و سێ سڤیل شەهیدبوون

هێرشا ئارتێشا تورکیا بۆ سەر ڕۆژئاڤایێ کوردستانێ
فۆتۆ: 
2019-10-10

277 جار خوێندراوەتەوە

ئاژانسا هاوار نیۆز یا ڕۆژئاڤایێ کوردستانێ بەلاڤکر، ئارتێشا تورکیا کاروانەکێ سڤیلان ل ڕێیا رەقا بۆ گرێ سپی کرنە ئارمانج کو دخواستن بچنە دەڤەرێن سنوری ب مەرەما پشکداریکرن د مەرتالا زیندی دا.

بەحسا وێ یەکێ ژی کر، د بۆمبەبارانا ئارتێشا تورکیا دا سێ وەلاتیێن سڤیل شەهیدبوونە و ب دەهان ژی برینداربوونە.

دازانین ژی، ژ سەرێ سپێدەهیا ئەڤرۆ ڤە هەیا نها ئارتێشا تورکیا ب بەردەوامی و ب دژواری گوندێ عەین دیوار یێ سەر ب باژارۆکێ دێرکێ و دەردورا گرێ سپی و ناحیەیا عەین عیسا ل ڕۆژئاڤایێ کوردستانێ ب تۆپباران و بۆمبەباران دکەن.

هێرشێن ئارتێشا تورکیا د دوویەم ڕۆژا خۆ دا بۆ سەر سنورێن باکور و ڕۆژهەلاتا سوریایێ بەردەوامن و ل پرانیا دەڤەرێن سنوری شەڕ و پەڤچوونێن دژوار هەنە، درەنگیا شەڤا دەربازبوویی ژی رەوانگەها سوری بۆ مافێن مرۆڤان ئاشکرا کر، د یەکەم ڕۆژا ڕاگەهاندنا ئۆپەراسیۆنا تورکیا و دەستپێکرنا هێرشان دا ١١ وەلاتی شەهیدبوونە و هەژمارەکا زێدە ژی بریندارابوونە کو پڕانیا وان سڤیلن.

س.م