سەرنووچە:

مایک پۆمپیۆ: ئیران بەرپرسە ژ هێرشێن سەر وێستگەهێن نەفتا ئارامکۆ

فۆتۆ: 
2019-09-19

181 جار خوێندراوەتەوە

جارەکا دی مایک پۆمپیۆ، ئیران ب بەرپرس ژ هێرشێن سەر وێستگەهێن نەفتا ئارامکۆ ل سعودیێ تۆهمەتبارکر و بۆ یەکەمجار ژی هێرش ب "سەدەما شەڕی" بناڤکر.

مایک پۆمپیۆ وەزیرێ دەرڤەیێ ئەمریکا، سەرەدانا سعودیێ کر و دگەل محەمەد بن سەلمان شازادێ وی ولاتی جڤیا و ڕاگەهاند، ئەوێن کو بوونە ئارمانجا هێرشان سعودی بوون، هێرشی سەر ئاخا وان هاتیە کرن، ئەڤە ژی سەدەما شەڕی یە کو ب ئاوایەکێ ڕاستەڕاست کرنە ئارمانج.

بەحسا وێ یەکێ ژی کر، د جڤینا داهاتی یا جڤاتا ئاسایشێ دا ل نیویۆرکێ دێ بابەتێ هێرشکرنا سەر سازیێن نەفتیێن سعودیێ هێتە گۆتۆبێژکرن.

هەر د جڤینا خۆ یا دگەل بن سەلمانێ شازادە دا، وەزیرێ دەرڤەیێ ئەمریکا پشتەڤانیا ولاتێ خۆ بۆ حکومەتا ڕیازێ تەکەزکر.

ئێڤاریا دوهی چارشەمبیێ ١٨ێ ئیلۆنێ وەزارەتا بەرەڤانیا سعودیێ چەند بەلگە و پارچەیێن چەکی کو د هێرشێن سەر زەڤیێن نەفتێ یێن ئارامکۆ دا هاتنە بکارئینان نیشاندان و ڕاگەهاند، لگۆری بەلگەیان ئیران تۆهمەتبارە ب وان هێرشان، هێرش ل دەڤەرا باکورێ وی ولاتی و ب پشتەڤانیا کۆمارا ئیسلامیا ئیرانێ هاتنە کرن، تەکەز کر ژی، کو سعودیێ شیانێن بەرەڤانیکرن ژ ژێرخانا ولاتێ خۆ هەیە.

ڕۆژا ١٤ێ ئیلۆنێ ب ڕێیا هەژمارەک بالافرێن بێ بالافرڤان هێرشی سەر دوو کارگەهێن مەزنێن سەر ب کۆمپانیا ئارامکۆ ل سعودیێ هاتە کرن، پشتڕا حوسیێن یەمەنێ بەرپرسیارەتیا خۆ لسەر هێرشێ ڕاگەهاند، ڤێ یەکێ ژی بهایێ نەفتێ د دەمەکێ کێم دا ب ئاوایەکێ بەرچاڤ ل جیهانێ بلند کر.

س.م