سەرنووچە:

پشتى دەربازبوونا ٥٧ رۆژان بسەر دەستەسەرکرنا هارۆن سلێڤانەی هەیا نها نەهاتیە ئازادکرن

هەمى تومەت هاتنە ڕەتکرن
فۆتۆ: 
2019-08-20

868 جار خوێندراوەتەوە

دەما ٥٧ رۆژانە کومیسەرێ پۆلیسان هارۆن سلێڤانەی هاتیە ڕاگرتن لسەر وێ یەکێ کو ئاسایشا زاخۆ سکالا لسەر لاپەرەیەکێ فەیسبوکی هەیە کو گومان ل سەر هارۆن سلێڤانەی درۆستکریە کوئەو برێڤەدبەت.

خەتاب عومەر پارێزەرێ هارۆن سلێڤانەی بۆ ئێن ئاڕ تى ڕاگەهاند، دەما ٥٧ رۆژانە کومیسەرێ پۆلیسان هارۆن سلێڤانەی هاتیە ڕاگرتن، لسەر وێ یەکێ کو ئاسایشا زاخۆ سکالا لسەر لاپەرەیەکێ فەیسبوکی هەیە، و گومان درۆستکریە کو ژئالیێ وی ڤە هاتیە برێڤەبرن و ئاسایشا زاخۆ و کارمەندێن وێ ١١ سکالا لسەر تومارکرنە، لێ هەمى تومەت ژ ئالیێ هارۆن سلێڤانەى ڤە هاتنە ڕەتکرن، د نها دا ئەو لاپەرەیێ فەیسبوکی ب ئاشکری ژ ئالێێ هندەک کەسان ڤە دهێنە برێڤەبرن و ئەو تەکەز دکەن کو ئەو لاپەرەیێ تایبەتە ب وان ڤە.

دیار ژى کر، لدیف یاسایێ مافەکێ ئاساییە کو ب کەفالەت بهێتە ئازادکرن  و زێدەترى ١٠ جاران پارێزەرێن وێ کەیسێ داخوازی پێشکیشکریە لێ هەیا نها چ بەلگەهێن یەکئالیکەر د دەستێن وان دا نەبوونە و نەهاتیە ئازادکرن.

پارێزەرێ هارۆن سلێڤانەی زەلال ژى کر، ئەو دلگرانن لسەر چاوانیا سەرەدەریکرن دگەل وێ کەیسێ کو پشتى ل دادگەها زاخۆ هاتیە ڤەکوهاستن بۆ دادگەها دهۆکێ زێدەترى ١٦ ڕۆژان ڤەکێشا هەیا کەیسێن وى هاتنە ڤەگوهاستن و هەست ب وێ یەکێ دهێتە کرن کو گیروو کرن یا د ڤێ کەیسێ دا هەی و ژ گومانێ دەردکەڤیت و د چیتە د چارچووڤێ تولڤەکرنا بناڤێ یاسایێ بیت.

ل شەڤا ٢٣ێ هەزیرانا ۲۰۱۹ێ مەفرەزکا ئاسایشا زاخۆ سەر بنگەھەکێ پۆلیسێن زاخۆ دا گرت و ب تومەتا ئەندمبوون د چەند پەیجێن فەیسبوکی دا ھارون سلێڤانەی هاتە دەستەسەرکرن، بەرى وی دەمی ژى چەندین جاران ژ ئالیێ رێکخراوێن پارتی ڤە داخاز ژی ھاتیە کرن کو ئالی گریان وان بکەت لێ ھارونی رەتکریە.