سەرنووچە:

نڤیسینگەها ڕزگارکریێن ئێزدی: هەیا نها دوو هزار و ٩٠٧ کچ و ژنێن ئێزدی نەهاتینە ڕزگارکرن

فۆتۆ: 
2019-08-20

178 جار خوێندراوەتەوە

نڤیسینگەها ڕزگارکریێن ئێزدی ل دهۆکێ ڕاگەهاند، هەیا نها سێ هزار و٥٠٩ کچ و ژن و زارۆکێن ئێزدی هاتنە ڕزگارکرن و دوو هزار و ٩٠٧ێن دی ژی نەهاتینە ڕزگارکرن.

حسێن قایدی بەرپرسێ نڤیسینگەها ڕزگارکریێن ئێزدی ل دهۆکێ بۆ ئێن ئاڕ تی ڕاگەهاند، نڤیسینگەها وان دگەل دەستپێکا دەستپێکرنا ئۆپەراسیۆنێن ڕزگارکرنا دەڤەرێن بن دەستێ داعشێ و هەیا نها سێ هزار و ٥٠٩ کەس ژ ڕەڤاندیێن دەستێ داعشێ ڕزگارکرنە کو ٣٣٨ ژ وان زەلامن و هزار و ١٩٢ ژنن، هزار و ٩٧٩ زارۆکن ژ هەردوو ڕەگەزان.

دیارکر ژی، دوو هزار و ٩٠٧ ژن و زارۆک ماینە و هەیا نها نەهاتنە ڕزگارکرن، بزاڤێن وان د بەردەوامن و نا ڕاوەستن هەیا چارەنڤیسێ هەموویان دیاردکەن.

دەربارەی گیرۆبوونا ڤێ پرۆسەیێ و نەڕزگارکرنا هەژمارەکا زێدە، ناڤبری دازانین، وان ب چەند قوناغان دەست ب ڤێ پرۆسەیێ کریە و هەژمارەکا زێدە یا وان وەلاتیان ل کەمپا هۆلێ یا ڕۆژئاڤایێ کوردستانێ دانە و دیسان هەژمارەک ژن و زارۆکێن ئێزدی د گرتیگەهەکا دەڤەرا فورسای یا بەغدا دانە کو تەڤاهیا خێزان و هەڤژین و زارۆکێن داعشێ یێن هاتی دەستەسەرکرن ژی د وی گرتیگەهێ دانە، ئەو پێدڤی هەڤبەندیێ نە بۆ ڕزگارکرنا وان.

داخویاکرن ژی، ل کەمپا هۆلێ هەیا نها ڕێک ب وان ناهێتە دان بچن سەرەدانا کەمپێ بکەن و ژن و زارۆکێن د وێ کەمپێ دا ڤەگەڕینن، بۆ ڤێ مەرەمێ ژی د نها دا ئەو دگەل ڕێکخراوێن ناڤدەولەتی ل هەرێمێ د بزاڤ دانە کو هەڤبەندیێ دگەل ڕۆژئاڤا دروستبکەن و ڕێیا وان کەمپ و دەڤەران لهەمبەر وان ڤەکەن کو ڕەڤاندیێن ئێزدی تێدانە.

ئەو یەک ژی دیارکر، کو یەک ژ سەدەمێن دی یێن نەڤەگەڕاندنا ڕەڤاندیێن مایێن ئێزدی ژ بۆ لێنەپرسین و کێمتەرخەمیا دەزگەهێن ئەولەهیێ یێن عێراقێ ڤەدگەریت، پێشتر وان گەلەک جاران داخواز کربوو کو د دەڤەرێن نوو کۆنترۆل دکەن ئاگەهداریان بسەر خەلکی دا بەلاڤ بکەن و هەر کەسێ کچەک یان ژن یان زارۆکەکا ئێزدی د مالێن وان دا هەنە ڕادەست بکەن، لێ ئەو کار نەکرن،  حکومەتا عێراقێ وەک پێدڤی نە خۆ ل ڕزگارکرن و نە ل چارەسەرکرنا ڕەوشا ساخلەمی و دەبارا ڕزگارکریان کریە خۆدان.

س.م