سەرنووچە:

برایێ ماریا هەورامی: ب ڕێکا یاسایێ دێ کارێ خۆ کەین

فۆتۆ: 
2019-08-14

4271 جار خوێندراوەتەوە

برایێ هونەرمەند ماریا هەورامی دەربارەی ئاخافتنێن مەلا هەلۆ لسەر خۆشکا وی ڕاگەهاند، "ئەو بەرێزە ب چ شێوەیەکێ خزمێ مە نینە و نانیاسین ژی" و دبێژیت ژی، "دێ ب ڕێکا یاسایێ کارێ خۆ کەین".

د زەلالکرنەکێ دا بێستوون هەورامی برایێ هونەرمەند ماریا هەورامی دیارکر، "بۆ ڕێگریکرن ژ ڤان هێرشێن ناڕەوایێن ناڤبناڤ بۆ سەر هونەرمەند و نڤیسەران دهێنە کرن، پێدڤیە ب ئێکدەنگیا تەڤاهیا ڕۆشەنبیران و ڕێکخراوێن کۆمەلگەها سڤیل و هونەرمەندان و کەسایەتی و هەموو مرۆڤەکێ ئازادیخواز هەیە، هەیا کو نەهێلین ئەڤ جورە کەسە بناڤێ ئاینی کەلتورێ ڕەسەنێ گەلێ مە ژناڤببەن".

بەحسا وێ یەکێ ژی کریە، "مە بڕیار دایە ب ڕێکا یاسایێ کارێ خۆ بکەین و بلا دادگەهـ مافێ تەشهیرکرن ب ماریایێ وەرگریت، ئەو بەڕێز ژی ل دادگەهێ زەلالکرنا خۆ لسەر ئاخافتنێن خۆ بدەت".

داخوازکریە ژی، "یاسا سەروەر بیت و داخازکارێن گشتی ژی بێدەنگ نەبن لسەر ڤان جورێن سڤکاتیکرنان".

دەربارەی هەبوونا پەیوەندیا خزمایەتیا ناڤبەرا مەلا هەلۆ و ماریا هەورامی، بێستوون هەورامی دیارکریە، مەلا هەلۆی ب خزمێ خۆ نزانن و ناناسن ژی، لسەر بنەمالا خۆ حساب ناکەن.

ئەڤە ژی دەمەکێ دایە، پشتی بەلاڤبوونا کلیپەکا نوو یا هونەرمەند ماریا هەورامی ل جادەیا سەهۆلەکە یا سلێمانیێ و پشکداریپێکرنا خەلکی د کلیپێ دا، کارڤەدانێن جودا د تۆڕێن جڤاکی لدیف خۆ دائینان.

مەلا هەلۆ ژی کو مامۆستایەکێ ئاینیە د تۆمارەکا دەنگیدا چەند ئاخافتنێن "بێڕێز" ل هەمبەر وێ هونەرمەندێ بکارئینان، پشتڕا د تۆمارەکا دی یا دەنگی دا بەحسا وێ یەکێ کر، کو ئەو ئاخافتنێن وی د بەرسڤا مەلایەکێ دی دا بوونە و بۆ ڕایا گشتی ئەو ئاخافتن نەکرنە، تنێ بۆ هەڤالەکێ خۆ هنارتیە و دگەل بەلاڤکرنێ ژی دا نەبوویە، پەشیمانیا خۆ نیشاندا لسەر ئاخافتنێن خۆ و گوت، "دێ تۆبەکەم و وێ خۆشکێ ژی هەر چی هەیە بلا ل دادگەهێ داخواز بکەت و بەرهەڤم بچمە دادگەهێ".

س.م