سەرنووچە:

هاتنوچوونا دهۆکێ ئامارا بوویەرێن ڕۆژێن جەژنێ بەلاڤکر

فۆتۆ: 
2019-08-14

543 جار خوێندراوەتەوە

دیجیتال میدیایا ئێن ئاڕ تی، دهۆک، تائیف گۆران

هاتنوچوونا دهۆکێ ئامارا بوویەرێن هاتنوچوونێ یێن ڕۆژێن جەژنێ بەلاڤکرن و دازانین، د هەر چار رۆژێن جەژنێ دا ل سنورێ پارێزگەها دهۆکێ ١٠ بوویەر چێبوونە و سێ کەسان جانێ خۆ ژ دەستدانە.

ئازاد تەها پەیڤدارێ هاتنوچوونا دهۆکێ بۆ ئێن ئاڕ تی ڕاگەهاند، د هەر چار رۆژێن جەژنێ دا ل سنورێ پارێزگەها دهۆکێ ١٠ بوویەرێن هاتنوچوونێ دروست بووینە سێ کەسان جانێ خۆ ژ دەستدانه و ٢٩ کەسێن دی ژی برینداربووینه کو برینا ١٠ ژ وان گرانن و لبن چاڤدێریا نوژدارانن.

دازانین ژی، پڕانیا بوویەران ل دەرڤەی سەنتەرێ پارێزگەها دهۆکێ بوونه، ئەو وەک هاتنوچوون رێنمایا شوفێران دکەن و داخازدکەن، پێگریێ ب رێنمایێن هاتنوچوونێ بکەن بۆ کو توشی بوویەرێن دلتەزێن نەبن.

بەحسا وێ یەکێ ژی کر، هەڤبەرکرن دگەل جەژنا دەربازبوویی بوویەرێن هاتنوچوونێ کێمتر بووینه.

ئەڤە ژی دەمەکێ دایە، لگۆری ئامارێ ڕێڤەبەریا هاتنوچوونا دهۆکێ د شەش مەهێن دەستپێکا ئەڤ سالە دا ل سنورێ پارێزگەها دهوکێ ٤٢٧ بوویەرێن هاتنوچوونێ روودانە، ب وێ سەدەمێ ژی ٤٥  کەسا جانێ خو ژ دەستدانە و ٥٠٢ کەسێن دی ژی برینداربووينە.

بوویەرێن هاتنوچوونێ ب یەکەم سەدەما جان ژ دەستدانا وەلاتیان د هەرێما کوردستانێ دا دهێتە دانان، لگۆری ئاماران ژی د ١٥ سالێن دەربازبوویی دا، ل هەرێما کوردستانێ زێدەتری ١٠ هزار کەسان جانێ خۆ ژ دەستدانە و زێدەتری ١٠٠ هزار کەسان ژی کێمئەندام و برینداربوونە.

س.م