فۆتۆ:
2019-08-14
827 جار خوێندراوەتەوە
نوژدار و پسپۆرێن ساخلەمیێ ڕێنمایان ددەن لسەر وێ یەکێ شەڤانە هەری کێم هەشت دەمژمێران بنڤین، لێ هندەک کەس هەنە کو زێدەباری وێ یەکێ گەلەک دنڤن و دەما نڤستنا وان ژ ١٠ دەمژمێران زێدەترە، هەست ب ماندیبوونا بەردەوام و خەوکیێ دکەن و پشتی ژ خەو ڕابوونێ نیشانێن ماندیبوونێ لسەر دیاردبن.
لگۆڕی ڕووپەلا "هایل براکسیس" یێ ساخلەمیێ دیارکریە، ئەگەر ئەڤ حالەتە بەردەوام بیت وی دەمی دێ ب ماندیبوونا دومدرێژ هێتە بناڤکرن، ب ڕەنگەکێ ماندیبوون ب درێژاهیا ڕۆژێ بەردەوام دبیت، چیدبیت ئەڤ بەردەوامیە نیشانەیەک بیت بۆ ئاریشەیەکا ساخلەمیێ یا دومدرێژ، ژ وان ژی:
١- کێمیا ئاسن:
کەسێن کو هەردەمی هەست ب ماندیبوونا بەردەوام دکەن، وزەیا لەشی یا کێمە و پێدڤیە پشکنینێ بۆ ڕێژەیا ئاسنی یا د لەشێ خۆ دا بکەن، ژبەر کو ماندیبوونا مەردەوام چێدبیت نیشانە بیت بۆ کێمیا ئاسنی د خوینێ دا، ڤێ یەکێ ژی باندۆریا نەرێنی لسەر ڤەگوهاستنا ئۆکسجینێ ژ تەپێن سۆر بۆ خانەیێن لەشی دبیت.
٢- کێمیا ڤیتامین: B12
نیشانێن کێمیا ڤیتامین B12 هەمان نیشانێن کێمیا ئاسنی د لەشی دا هەنە، ژبەر وێ ژی ساناهی نینە بهێتە زانین کیشک ژ وان د لەشی دا کێمبوویە، ژبەر ڤێ یەکێ ژی پێدڤیە پشکنینا نوژداری بهێتە کرن، ئەڤ جۆرێ ڤیتامینێ زێدەتر د ماسیا سەلەمون، گۆشتێ چێلێ، بەرهەمێن سپیاتیێ و هێکێ دا ب بڕەکا زێدە هەیە.
٣- نەخۆشیا شەکرێ:
چێدبیت ماندیبوون و بێتاقەتیا بەردەوام ژبەر هەبوونا نەخۆشیا شەکرێ بیت، ژبەرکو کێمیا هۆرمۆنا ئەنسۆلین د لەشی دا وەسا دکەت کاربۆهیدرات ب باشی د لەشی دا نەهێنە وەرگرتن و پشترا نەبنە وزە، د ڤی حالەتی دا ژی پێدڤیە سەرەدانا نوژدارێ پسپۆر بهێتە کرن و پشکنینا گشتی بۆ خوین و ڕێژەیا شەکرێ بهێتە کرن.
٤- کێم لڤین:
کەسێن کو پڕانیا دەمێن وان لسەر کۆمپیۆتەرێ دبەنە سەر یان گەلەک ڕۆنشتینە و هەست ب ماندیبوونا بەردەوام دکەن، بۆ دووربوون ژ ڤان حالەتان ژی باشتر ئەوە وەرزش د سەقایەکێ پاقژ دا بهێتە کرن، ژبەر کو هەڤکارە بۆ چالاکبوونا زڤڕۆکا خوینێ و ساخلەمبوونا لەشی.
٥- کێمیا ڤەخوارنان
نوژدار و پسپۆرێن ساخلەمیێ ڕێنمایان لسەر وێ یەکێ ددەنە کەسان کو پێدڤیە هەری کێم لیترەک و نیڤێن ئاڤێ ڤەخون، د حالەتێ نەخۆشی و بلندبوونا پلەیا گەرمیێ و وەرزشکرنێ دا پێدڤیە ئەو ڕێژەیە بهێتە زێدەکرن، ژبەرکو ئەگەر خانەیێن لەشی ئاڤا پێدڤی نەبیت، ب باشی کار ناکەن.
٦- دژە هستامین:
کەسێن کو د وەرزێ بهارێ دا هەستیاری "حەساسی" هەنە و دەرمانێن دژە هەستیاری "دژە هستامین" بکاردئینن، ئەڤ دەرمانە هەستیاریێ کێمدکەن لێ دبنە سەدەما هەستکرن ب ماندیبوون و خەوکیا زێدە، ژبەر وێ نوژدار ڕێنمایان ددەن بەریا نڤستنێ بخون هەیا کو سپێدێ و ل دەما ڕابوون ژ خەوێ باندۆریا وێ کێم ببیت و لەش یێ چالاک بیت.
٧- ئاریشەیا غودەیێ:
دەما کو ئاریشەیەک د غودەیێ دا هەبیت باندۆریێ لسەر هەموو لەشی دروست دکەت، ژبەرکو غودە بنگەها هۆرمۆنانە د لەشی دا، ژبلی کو کۆنترۆلا کردارا زیندەپال دکەت و باندۆری لسەر بەشێن دی یێن لەشی هەیە.
دەما کو غودە ب باشی کار نەکەت هۆرمۆنێن سیرۆکسین و سێیانەیا یۆدسیرۆنین ب باشی ناهێن بەرهەم ئینان، ڤێ یەکێ ژی باندۆری لسەر ئەندامێن دی یێن لەشی دبیت و لێدانا دلی کێم دکەت و هەستکرن ب ماندیبوونێ زێدە دکەت.
د هەمان دەم دا زێدەگاڤیا چالاکیا غودەیێ سەدەمە بۆ هەستکرن ب ماندیبوون و خەوکیێ، ژبەرکو خانە بێ کو پێدڤی بیت بڕەکا زێدە یا ئۆکسجینێ بکاردئینن، ئەڤە ژی دبیتە سەدەما زێدەکرنا لێدانا دلی و هەست ب تڕس و بێهێزیێ پەیدا دبیت. ژبەر وێ ژی ئەگەر بەردەوام تە هەست ب ڤێ ماندیبوونێ کر دگەل دا هەستیاری پەیدابوو، کێشا تە زێدەبوو و تەمبەلبووی، باشترە بلەزترین دەم سەرەدانا نوژداری بکەی.
