سەرنووچە:

شێخان.. بالەفرێن تورکیا تڕۆمبێلەکا پەکەکێ کرە ئارمانج و د ئەنجامێ دا سێ گەریلا شەهیدبوون

فۆتۆ: 
2019-07-19

4278 جار خوێندراوەتەوە

دیجیتال میدیایا ئێن ئاڕ تی، شێخان، تائیف گۆران

ئێڤاریا دوهی بالەفرێن تورکیا تڕۆمبێلەکا پەکەکێ ل ناحیەیا ئەترووش یا سەر ب قەزا شێخان کرە ئارمانج.

نووچەگەهانێ ئێن ئاڕ تی ل شیخان ڕاگەهاند، ئێڤاریا دوهی بالەفرێن شەڕیێن تورکیا تڕۆمبێلەکا پەکەکێ ل گوندێ کەلە کەڤنێ یێ سەر ب ناحیەیا ئەترووش یا سەر ب قەزا شێخان کرە ئارمانج، کو سێ گەریلا تێدابوونە.

بەحسا وێ یەکێ ژی کر، هەرسێ گەریلایێن کو د ناڤا تڕۆمبێلێ دابوونە شەهید بوونه.

گوت ژی، تڕۆمبێل ژ جۆرێ تویوتا ڕەف( جێب)  بوویە و زەرەرێن مەزن بەر ب تڕۆمبێلێ کەفتنە.

ب هێجەتا هەبوونا پارتا کارکەرێن کوردستان – پەکەکێ هەیا دچیت تۆپ و بۆمبەبارانێن ئارتێشا تورکیا بۆ سەر دەڤەرێن سنوری و گوند و جهێن ئاڤەدانێن پارێزگەهێن دهۆک، هەولێر و سلێمانیێ زێدەتر دبن، شەڤا دەربازبوویی ژی بالەفرێن شەڕ یێن تورکیا ناڤا گوندێ سپیندارێ یێ سەر ب ناحیا چەمانکێ یا گرێدای قەزا ئامێدیێ بۆمبەبارانکر و د ئەنجامێ دا سێ وەلاتیێن سڤیل برینداربوون.

هەر شەڤا دەربازبوویی دەمژمێر ١٢ و نیڤ، بالەفرێن شەڕیێن تورکیا ب چەند مووشەکان کەمپەکا ئاوارەیان ل مەخمور بۆمبەباران کر، د ئەنجامێ دا دوو کەس برینداربوون و زەرەرێن مادی ژی بەر ب دەڤەرێ کەفتنە.

ئەڤە ژی دەمەکێ دایە، دەمژمێر ١ێ پشتی نیڤرۆیا ئەڤرۆ ئەینیێ (١٩ێ تیرمەها ٢٠١٩ێ) ژی بۆ یەکەمجار گوندێ هیزانکێ ل دەڤەرا نەهلێ یا سەر ب قەزا ئاکرێ ژ ئالیێ بالەفرێن شەڕیێن تورکیایێ هاتە بۆمبەباران کرن.

س.م