سەرنووچە:

ته‌سه‌یێن فسفۆری دێ‌ لسه‌ر جادده‌یێن دهۆكێ هێنه‌ دانان

فۆتۆ: 
2019-07-17

345 جار خوێندراوەتەوە

نووچەگەهانێ دیجیتال میدیایا ئێن ئار تى، دهۆک، بریار نێروەى

رێڤه‌به‌ریا گشتیا باژێرڤانیان ل پارێزگه‌ها دهۆكێ‌ ب هه‌ڤكاری دگه‌ل رێڤه‌به‌ریا هاتنوچوونا پارێزگه‌ها دهۆكێ‌ مژوولی ئه‌نجامدانا پرۆژه‌یێ‌ چێكرنا ته‌سه‌یێن ده‌ستكرده‌ و ب رێکا ڤی پرۆژه‌ی، دبیت هه‌مى ته‌سه‌یێن ده‌ستكرد بهێنه‌ راكرن و لدیف ستانداردێن جیهانی و فسفۆری بهێنه‌ دانان و ئه‌ڤ پرۆژه‌ دێ‌ بیته‌ ئه‌گه‌ر کو دانانا ته‌سه‌یان بهێته‌ رێكخستن و چ كه‌سه‌ك نه‌شێت ژ ده‌ڤ خۆ ته‌سه‌یان بدانیت.

ئه‌ندازیار دیار به‌حری ره‌سول رێڤه‌به‌رێ‌ گشتیێ‌ باژێرڤانیان ل پارێزگه‌ها دهۆكێ‌ بۆ ئێن ئار تى راگەهاند، ئه‌م كار ل سه‌ر هندێ‌ دكه‌ین ته‌سه‌یێن ده‌ستكرد بهێنه‌ رێكخستن و ل گۆره‌ی رێنمایێن ته‌كنیكی و ستانداردێن جیهانی بهێنه‌ دانان و به‌ری هه‌ر ته‌سه‌كێ‌ ژی تابلۆیه‌ك بهێته‌ دانان بۆ هندێ‌ شۆفێر ژ دوورڤه‌ بزانن ته‌سه‌یه‌ك ل به‌ر سینگێ‌ وانه‌.

رێڤه‌به‌رێ‌ گشتیێ‌ باژێرڤانیان ل پارێزگه‌ها دهۆكێ‌ ئاشكرا ژى كر، كو په‌یوه‌ندی دگه‌ل رێڤه‌به‌ریا هاتنوچوونا پارێزگه‌ها دهۆكێ‌ كریه‌ و دێ‌ كۆمبوونه‌كا تایبه‌ت هێته‌ كرن لسەر رێكخستنا دانانا ته‌سه‌یێن ده‌ستكرد، ژبەرکو دانانا هه‌ر ته‌سه‌یه‌كا ده‌ستكرد پێدڤی ب بریارا هاتنوچوونا پارێزگه‌ها دهۆكێ‌ یه‌ كا ل كیڤە پێدڤی پێ‌ هه‌یه‌ بۆ پاراستنا گیانێ‌ وه‌لاتیان.

ئاشكرا ژی كر، ئاریشا مه‌زن یا دانانا ته‌سه‌یێن ده‌ستكرد ئه‌وه‌ شۆفێر ژ دوورڤه‌ نابینن و گه‌له‌ك جاران ژ ئه‌گه‌رێ‌ ڤێ‌ چه‌ندێ‌ زیان ب وه‌لاتیان دكه‌ڤن، و ژ به‌ر هندێ‌ ژی مه‌ پێشنیاز كریه‌ تابلۆ ب دووراتیا ١٠٠ هه‌تا ٢٠٠ مه‌تران بهێنه‌ دانان بۆ هندێ‌ شۆفێر د ئاگه‌هداربن ل به‌ر سینگێ‌ وان ته‌سه‌یه‌كا ده‌ستكرد هه‌یه‌.

هەروەسا دازانین، ئه‌م ل گه‌ل رێڤه‌به‌ریا هاتنوچوونا دهۆكێ‌ رێكه‌فتینه‌ كو دانانا ته‌سه‌یێن ده‌ستكرد د پرۆژه‌یێ‌ نوو دا نه‌هێنه‌ بۆیاغكرن، ژبەرکو بۆیاغ زوو ژێ‌ دچیت و پێدڤیه‌ فسفۆر دناڤ ته‌سه‌یان دا هه‌بن و چ جاران ژ كارنه‌كه‌ڤن و شۆفێر ژ دوورڤه‌ ته‌سه‌یێ‌ ببینن و فۆرمه‌كا ستاندارد دێ‌ هێته‌ چێكرن ژلایێ‌ رێڤه‌به‌ریا هاتنوچوونا دهۆكێ‌ ڤه‌ لدیڤ ستانداردێن جیهانێ‌ و ل گه‌ل سنوورێ‌ باژێرڤانیێن رێڤه‌به‌ریا گشتیا باژێرڤانیان ل پارێزگه‌ها دهۆكێ‌ بگونجیت و د ڤێ‌ فۆرمێ‌ دا دێ‌ جهێ دانانا ته‌سه‌یان ژلایێ‌ باژێرڤانیێن هه‌ر قه‌زا و ده‌ڤه‌ره‌كێ‌ بهێنه‌ ده‌ستنیشانكرن و ب راپۆرت بۆ رێڤه‌به‌ریا هاتنوچوونێ‌ بهێنه‌ هنارتن بۆ هندێ‌ ڤه‌دیتن بۆ بهێته‌ كرن و رازه‌مه‌ندی لسه‌ر بهێته‌ دان.

ئەو یەک ژى دیار کر،  ب چ ئاوایەکێ نابیت چ كه‌سه‌ك ژ لایێ‌ خۆڤه‌ بێی رازه‌مه‌ندیا رێڤه‌به‌ریا گشتیا باژێرڤانیان و رێڤه‌به‌ریا هاتنوچوونێ‌ ته‌سه‌یه‌كا ده‌ستكرد بدانیت و ل ده‌مێ‌ دانان و سه‌خبێریكرنا هه‌ر ته‌سه‌یه‌كێ‌، پێدڤیه‌ نیشانێن هشیاریێ‌ ل دووری ته‌سێ‌ بهێنه‌ دانان، دا كو شۆفێر ئاگه‌هداربن ل دور سه‌خبێریكرنێ‌.

م.س