سەرنووچە:

پاڕلەمانێ عێراقێ بۆ دەنگدان لسەر تەمامکرنا کابینەیا عادل عەبدولمەهدی دێ جڤیت

 دەمژمێر ١١ جڤین دێ دەستپێکەت
فۆتۆ: 
2019-06-22

169 جار خوێندراوەتەوە

ئەڤرۆ شەمبیێ پاڕلەمانێ عێراقێ دێ جڤیت و مژارا سەرەکی یا ڕوونشتنێ دێ تایبەت بیت ب تەمامکرنا کابینەیا عادل عەبدولمەهدی.

لگۆڕی کارنامەیا جڤینێ، کو دەمژمێر ١١ێ پشتی نیڤرۆ جڤینا پاڕلەمانی دێ دەست پێکەت، ژبلێ دەنگدان لسەر تەمامکرنا کابینەیا حکومەتێ دێ گۆتووبێژ لسەر چەند مژارێن دی ژی دێ هێنە کرن.

ئەڤە ژی د دەمەکێ دایە پێشتر ئاژانسا ئەنادۆل ژ زارێ چاڤکانیەکێ ل هەڤپەیمانیا دەولەتا یاسا بەلاڤکر، سەرۆک ئەڕکانی ئارتێشا عێراق فەریقێ یەکەم عوسمان غانمی، بۆ وەزیرێ بەڕەڤانیێ بەربژێرێ عادل عەبدولمەهدییە.

هەڤدەم بەحسا وێ یەکێ ژی کر،" فەریق مۆفەق جەنابی کو بریکارێ وەزارەتا ناڤخۆیە بۆ کاروبارێ پۆلیسان، بەربژێرێ سەرۆک وەزیرێن عێراقێ یە بۆ وەزیرێ ناڤخۆ".

بەریا نها ژی موقتەدا سەدر د پەیامەکێ دا داخواز ژ تەڤایا فراکسیۆنێن پاڕلەمانێ عێراقێ کر، دەسهەلاتێن تەمام ب عادل عەبدولمەهدی بدەن هەیا کو د دەمێ ١٠ ڕۆژان دا بکاریت کابینەیا خۆ تەمام بکەت.

هەڤدەم داخواز ژ عادل عەبدولمەهدی کر، بەرژەوەندیا گشتی ل بەرچاڤ بگریت و کەسێن پسپۆڕ و دەست پاقژ و خودان شیان هەلبژێریت ئەگەرنا پشتەڤانیێ لێ ناکەن.

نێزیکی ٨ مەها بەریا نها پارلەمانێ عێراق باوەری ب کابینەیا نوویا حکومەتا عێراقێ دا، لێ هەیا نها وەزارەتێن نأڤخۆ، بەڕەڤانی، داد و پەروەردە، ب سەدەما ناکۆکیێن ئالیێن سیاسی ناهیتە ئێکلای کرن.

س.ع