سەرنووچە:

ئەوقافا زاخۆ ب ڕێکا گوتارخوینا هۆشداریەکێ ب وەلاتیان ددەت

دەربارەی پیڤەرێن ئاڤێ
فۆتۆ: 
2019-06-20

3239 جار خوێندراوەتەوە

ڕێڤەبەریا ئەوقافا زاخۆ ب ڕێکا گوتارخوینا وەلاتیان ئاگەهدار دکەت، کو ئەگەر پیڤەرێن ئاڤێ د مالێن خۆ دا نەگرێدەن دێ هێنە سزادان.

لگۆڕی نڤیسارەکێ کو ئیمزایا سەعید عەبدولرەحمان حەمید ڕێڤەبەرێ ئەوقاف و کاروبارێن ئاینی یا زاخۆ لسەرە تێدا دیارکریە، "ژ پێخەمەت هۆشیارکرنا وەلاتیان لسەر گێردانا پیڤەرێن ئاڤێ (میزانی) د هەر مال و جهەکێ دا، د دەما سەردانکرنا کۆمپانیا گرێدانا پیڤەرێن، وەلاتی پێگیر نەبن دێ هێنە سزادان".

دیارکریە ژی، هەر مالەکا پیڤەرێ ئاڤێ نەدانیت، ژ ڕۆژا (١/٧/٢٠١٩) دێ هەیڤانە ب کوژمەکێ زێدە یێ پارەی هێتە سزادان.

د داویێ دا ژی گوتارخوینێن مزگەفتن ئەرکدارکرنە، کو د گوتارا ئەینیێ یا سوبەهی دا بەحس بکەن و وەلاتیان لسەر ڤێ یەکێ هۆشدار بکەن.

دەربارەی ڤێ ئاگەهدارکرنێ ژی ئێن ئاڕ تی پەیوەندی ب سەعید عەبدولرەحمان ڕێڤەبەرێ ئەوقافا زاخۆ کر و ناڤبری دیارکر، بڕیار ژ ئالیێ ڕێڤەبەریا ئاڤا زاخۆ هاتیە دان و ئەو کەرکدارکرنە ب گەهاندنا ڤێ ئاگەهداریێ ب ڕێکا گوتارخوینێن مزگەفتێن سنورێ قەزا زاخۆ.

ئەڤە ژی دەمەکێ دایە، ل پارێزگەها دهۆکێ ل ڕێکەفتێ ٧/١ ئەڤ سالە پیڤەرێن ئاڤێ هاتینە دانان و ٦٠% یێ پیڤەران بۆ وێ پارێزگەهێ هاتینە دانان، لێ بهایێ کریا ئاڤا هندەک وەلاتیان ٤٠٠ بۆ ٥٠٠ هزار دیناران هاتیە و زێدەترین بها ٨٦ ملیۆن دینار بوون کو بۆ مالەکێ هاتبوو، ڤێ یەکێ ژی کارڤەدانێن مەزن یێن وەلاتیان ل دیڤ خۆدا ئینان.

س.م