سەرنووچە:

ئێن ئاڕ تی هوورکاریێن چارەنڤیسێ مووچەیێ فەرمانبەرێن هەرێمێ ئاشکرا دکەت

چارەنڤیسێ مووچەیێ فەرمانبەرێن هەرێمێ دێ چ بسەر دا هێت؟
فۆتۆ: ئەرشیڤ
2019-06-16

4500 جار خوێندراوەتەوە

هەیا دهێت ئاریشەیێن سەر یاسایا بودجەیێ سالا ٢٠١٩ زێدەتر دبن، ب تایبەت پرسێن کو ب مووچەیێ فەرمانبەرێن هەرێم و پرسا فرۆتنا نەفتا هەرێمێ ب ئاوایەکێ سەربەخۆ گرێداینە.

ئێن ئاڕ تی ناڤەڕۆکا وێ ڕاپۆرتێ دەستکەفتیە کو دەربارەی پرسا نەفتا هەرێمێ ئاراستەی سەرۆکاتیا پەرلەمانی هاتیە کرن.

د ڕاپۆرتێ دا کو ئیمزایا سەرۆکێ لژنەیا دارایی لسەرە و لژێر سیبەرا مێهڤانداریا وەزیرێ داریی یێ عێراقێ و نوینەرێ کۆمپانیا سۆمۆ ل ڕۆژا ٢١ێ مەها دەربازبوویی هاتیە نڤیسین و تێدا هاتیە، بۆ وان ئاشکرا بوویە کو هەرێما کوردستانێ چ بڕێن نەفتێ ڕادەستی سۆمۆیێ نەکرینە و د هەمبەر دا مەهانە پارەیێ فەرمانبەران وەردگریت، ئەڤە ژی بنپێکرنا یاسایا بودجەیە، ئەندامەکێ دەولەتا یاسایێ ژی دبێژیت، پێشتر سەرۆک وەزیر لسەر ڤێ مەترسیێ هاتیە ئاگەهدارکرن.

لگۆری لهەڤهاتنا ڕاپۆرتێ ژی لیژنەیا دارایی شەش داخوازی ئاراستەی سەرۆکاتیا پارلەمانی کرنە، کو پێکدهێن ژ:-

یەکەم – سەرۆک وەزیر بهێتە نەچارکرن ب ڕێکا وەزارەتا دارایی تەڤاهیا مادەیێ ١٠ ژ یاسایا بودجەی جیبجی بکەت نەک بەشەکێ، د هەمبەر دا ژی ئەو بخۆ بەرپرسیارە.

دوویەم – پرسیار ل جڤاتا وەزیران بهێتەکرن، لگۆری چ یاسایەکێ حکومەتا بەرێ پارە بۆ هەرێمێ خەرجکریە د سالا ٢٠١٨ێ دا.

سێیەم – داخواز ژ وەزارەتا نەفتا عێراقێ بهێتەکرن، ڕێکارێن یاسای لدژی هەموو وان کۆمپانیان بگریتەبەر، کو نەفتا عێراقێ بێ ڕازیبوونا حکومەتا فیدڕال دکڕن.

چارەم – داخواز ژ وەزارەتا دارایی و دیوانا چاڤدێریا دارایی بهێتەکرن، ناڤەڕۆکا مادەیێ ١١ ژ یاسایا بودجەیێ سالا ٢٠١٩ێ جیبجی بکەن.

پێنجەم – داخواز ژ جڤاتا وەزیران بهێتەکرن کو ڕێکارێن پێدڤی بگرنەبەر و ڕێک نەهێتەدان مووچەیێ فەرمانبەرێن هەرێمێ بۆ کارێن دی بهێتە خەرجکرن، بەرڤاژی ئەگەر حکومەتا هەرێمێ پێگیرنەبوو، وی دەمی حکومەتا عێراقێ مووچەیێ هەرێمێ پارڤە بکەت.

شەشەم – لەز د دانانا یاسایا نەفت و غازێ دا بهێتەکرن ژ ئالیێ پارلەمانێ عێراقێ ڤە، د دەمەکێ دا کو نەگەهیتە وەرزێ داهاتی یێ یاسادانانێ.

هۆشیار عەبدوڵا ئەندامێ پەرلەمانێ عێراقێ و ئەندامێ لژنەیا دارایی ژی دبێژیت، ژبەر وان داخوازیان ژی بزاڤەک هەیە هەیا کو ڕێگڕیێ ژ ئینانا ڤێ ڕاپۆرتێ بۆ ناڤ پەرلەمانی بکەن.

هەرچەندە بودجەیێ سالا ٢٠١٩ێ دەربازبوو و بوویە یاسا، لێ ئالیێن شیعەیان دبێژن، ل دەرڤەیی پەرلەمانی ڕێکەفتن هاتیەکرن لسەر نەفتا هەرێمێ و یاسا ژی وەک خۆ ناهێتە جیبجی کرن، ژبەر وێ ژی داخواز ژ لژنەیا دارایی کریە کو وەزیرێ دارایی و سەرۆک وەزیران ژی بۆ پەرلەمانی گازی بکەن، ژبۆ دانا زەلالکرنێ لسەر نەفتا هەرێمێ و چاوانیا پارڤەکرنا مووچەیێ فەرمانبەران.

س.م