سەرنووچە:

دهۆک.. تەرمێ دلینێ هاتە ڤەشارتن

ل گۆرستانا شاخکێ
فۆتۆ: 
2019-06-12

3608 جار خوێندراوەتەوە

ئەڤرۆ ل دهۆکێ تەرمێ دلینێ ل مزگەفتا جودى هاتە شوشتن و پشترا ل گورستانا شاخکێ هاتە ڤەشارتن.

نووچەگەهانێ ئێن ئار تى راگەهاند، ئەڤرۆ ل پارێزگەها دهۆکێ تەرمێ دلینێ ژ ئالیێ نۆژداریا داد ڤە رادەستى مالباتا وێ هاتیە کرن، ل مزگەفتا جودى هاتە شوشتن و پشترا ل گورستانا شاخکێ هاتە ڤەشارتن.

دیارکر ژی، بڕیارە ل حەفتیا داهاتی دادگەهکرنا تۆهمەتباران دەستپێبکەت، د نها دا ١٥ پارێزەران بەرهەڤیا خۆ نیشاندانە بۆ وەرگرتنا کەیسا کوشتنا دلینێ.

ڕۆژا دوویێ یا جەژنا ڕەمەزانێ دلین وەلید یا تەمەن ١٠ سالی دگەل برایەک و کوڕمامەکێ خۆ ب مەرەما جەژن پیرۆزکرنێ چووینە دەرڤە و پشترا برا و پسمامێ وێ ڤەگەڕیانە و دلین نەڤەگەڕیا مال.

پشترا پۆلیسێن دهۆکێ دەربارەی بوویەرێ ڕاگەهاند، پشتی چەند دەمژمێران کەسوکارێن دلینێ پۆلیس ئاگەهدارکرنە کو کچا وان بۆ مال نە زڤڕیە و دیارنینە، پشتی گەڕان و ڤەکۆلین و بزاڤانێن تیمان، کارینە چەند کەسان دەستەسەر بکەن، یەک ژ دەستەسەرکریان تۆهمەتباربوویە ب کوشتنا دلینێ و دان ب تاوانا خۆدانایە و خواستیە دەستدرێژیا سێکسی بکەتە سەر، لێ دلینێ کریە هەوار و ڕێ نەدایە و ژبەر وێ یەکێ ژی دلین ب داران کوشتیە.

ڤێ یەکێ ژی کارڤەدانێن مەزن ل دیف خۆدا ئینان و چەندین خرڤەبوونێن نەڕازیبوونێ دەربارەی بوویەرێ ژ ئالیێ وەلاتیان ڤە بڕیڤەچوون، تێدا داخوازا بدارڤەکرنا تۆهمەتباران کرن.

دلین یەکەم زارۆک نینە ل دهۆکێ ب ڤی ڕەنگی دهێتە کوشتن، ل سالا ٢٠١٦ێ ژی زارۆکا بناڤێ مینا مێڤان یا تەمەن هەژدە مەهـ ژ ئالیێ گەنجەکێ ڤە هاتە کوشتن و پشتڕا بکۆژێ وێ هاتە بدارڤەکرن.

م.س