سەرنووچە:

د مەهەکێ دا زێدەتر ژ ٢٠٠ حالەتێن ئاگربەربوونا بەروبوومێن چاندنێ هەبوونە

زێدەترین حالەت ل سەلاحەدین بوونە
فۆتۆ: 
2019-06-08

172 جار خوێندراوەتەوە

بەرەڤانیا شارستانیا عێراقێ راگەهاند، د دەما یەک مەها دەربازبووى دا ٢٦٩ حالەتێن ئاگربەربوونا بەروبوومێن چاندنێ هەبوونە و ب وێ سەدەمێ ٣٧ هزار دۆنمێن زەڤیێن دەخلودانێ جوتیاران شەوتینە.

د راگەهاندنەکا رێڤەبەراتیا گشتیا بەرەڤانیا شارستانیا عێراقێ دا ئاماژە ب وێ یەکێ هاتیە کرن، زێدەترین حالەتێن ئاگربەربوونا زەڤیێن چاندنێ ل پارێزگەها سەلاحەدین بوونە کو ٩٤ حالەتن، پشتى وێ ژى نەینەوا ب ٥٥ حالەتان و کەرکوکێ ژى ٥١ حالەتان د پلەیێن دووەمین و سێیەمین دهێن.

هەروەسا زەلالکر، زێدەترین زرار ب زەڤیێن چاندنێ یێن پارێزگەها نەینەوا کەتنە، ٢٥ هزار ٦٣٣ هزار دۆنمێن عەردى شەوتینە، پشتى وێ ژی پارێزگەها سەلاحەدین دهێت  کو پێنج هزار و ٢٧٣ دۆنم زەڤیێن جوتیاران زرار ڤێکەتیە.

هەڤدەم ل پارێزگەها کەرکوکێ ژى چار هزار و ٩٩٢ هزار دۆنمێن زەڤیان شەوتینە ل پارێزگەها دیالێ ژى ٥٣٤ دۆنم شەوتینە.

بەرەڤانیا شارستانیا عێراقێ بەحسا وێ یەکێ ژى کریە، ل پارێزگەها واست هەشت حالەتێن ئاگربەربوونێ هەبوونە  و ٢٢٧ هزار دۆنم شەوتینە.

دەمەکە دەخلودانێ جوتیاران ل عێراق و چەند دەڤەرێن هەرێمێ ژى دهێنە شەوتاندن، زێدەبارى دەستەسەرکرنا چەند کەسان ، لێ تا نها بکەرێ راستەقینە یێ وان بوویەران نەهاتیە زانین.

م.س