سەرنووچە:

عێراق: دێ بزاڤێن خۆ دەینە کار ژبۆ ڤەگەڕاندنا تۆهمەتباران بۆ هەمبەر دادگەهێ

فۆتۆ: 
2019-05-26

829 جار خوێندراوەتەوە

وەزارەتا ناڤخۆیا عێراقێ ڕاگەهاندنەک دەربارەی دەستەسەرکرنا نەجمەدین کەریم بەلاڤکر و ڕاگەهاند، دێ هەموو بزاڤێن خۆ دەنە کار ژبۆ کو تۆهمەتباران بۆ هەمبەر دادگەهێ ڤەگەڕینن.

لگۆڕی ڕاگەهاندنێ کو ئەڤرۆ یەکشەمبیێ ٢٦ێ گۆلانێ بەلاڤکریە، ل دەستپێکێ وەزارەتا ناڤخۆ زانیاری لسەر وی بابەتی هەبوونە، ب ڕێیا فەرمانگەهێن پۆلیسێن عەرەبی و ناڤدەولەتی یێن ئەتەرپول تەڤاهیا ڕێکارێن یاسایی گرتنە بەر بۆ ڤەگەڕاندان داخوازکریان بۆ هەمبەر دادگەهێن عێراقێ.

دیارکر ژی، پشتی هەبوونا زانیاریان لسەر دۆسیەیێ وەزارەتا ناڤخۆ ب ڕێیا نڤیسینگەها ئەنتەرپولا بەغدا نڤیسارەک ب هەژمارە ٨٢٩٥ ل ٢١ گۆلانێ بۆ ئەنتەرپولا بەیروت شاندیە، ب مەرەما دەستەسەرکرنا نەجمەدین کەریم کو ژ ئالیێ دادگەهێن عێراقێ ڤە ب تۆهمەتا ب هەدەردانا سامانێ گشتی بڕیارا دەستەسەرکرنێ بۆ دەرچوویە.

د نڤیسارێ دا هاتیە، داخواز ژ ئەنتەرپول کرنە نەجمەدین کەریم ل وی ولاتی بهێلیت هەیا ژ ئالیێ دادگەهێن عێراقێ ڤە دۆسیەیا وی دهێتە شاندن.

وەزارەتا ناڤخۆ د نڤیسارێ دا دایەزانین ژی، ژ ئالیێ ئەنتەرپولا لوبنانێ ڤە هاتنە ئاگەهدارکرن کو نەجمەدین کەریم ب کەفالەت و لدیف یاسایێن وی ولاتی هاتیە ئازادکرن و پاسپۆرتا وی ژێ هاتیە وەرگرتن، ژبۆ کو نەکاریت گەشتێ بۆ چ ولاتەکێ بکەت هەیا وی دەمی دۆسیەیێن وی ل بەغدا دگەهنە لوبنانێ.

وەزارەتا ناڤخۆ زەلالکر ژی، دگەل ئالیێ دادوەریا لوبنانێ لسەر خەتن ژبۆ کو لدیف جیبجیکرنا ڕێکەفتنێن ناڤدەولەتی تۆهمەتبار نەجمەدین کەریم ڕادەستی دەستهەلاتا دادوەریا عێراقێ بکەن.

ڕۆژا ٢٥ێ ڤێ مەهێ ژ ئالیێ ڕۆژنامەیەکا لوبنانی ڤە نووچەیا دەستەسەرکرنا نەجمەدین کەریم پارێزگارێ بەرێ یێ کەرکوکێ بەلاڤکر و ڕاگەهاند، ژ ئالیێ چەند کەسایەتیان ڤە بزاڤا ڤەگەڕاندنا ناڤبری بۆ هەولێرێ دهێتە کرن، لێ بەغدا هەموو بزاڤێن هەولێرێ ژ پێخەمەت ئازادکرنا نەجمەدین کەریم ڕەتدکەت، ژبەر کو ناڤبری ژ ئالیێ دادگەهێن عێراقێ ڤە هاتیە داخوازکرن نەک دەزگەهێ دادوەریا هەرێما کوردستانێ.

ئەڤە ژی دەمەکێ دایە، نەجمەدین کەریم ڕۆژا ٢٢ێ ڤێ مەهێ د داخویانیەکێ دا بۆ دیجیتال میدیایا ئێن ئاڕ تى دازانین، د نها دا بۆ گەشتێ ل بەیروتا پایتەختا لوبنانێ یە و نەهاتیە دەستەسەرکرن، بەلکو ژ ئالیێ پۆلیسان ڤە بۆ چەند خولەکان هاتیە گازى کرن و ژێرە هاتیە گوتن کو ناڤێ وى د گەل ناڤێ کەسەکێ دن تێکهەل بوویە.

س.م