سەرنووچە:

ڕۆژنامەیەکا لوبنانی: دەستبسەر پاسپۆرتا ئەمریکی یا نەجمەدین کەریم دا هاتیە گرتن و ڕێ ب گەشتکرنا وی ناهێتە دان

فۆتۆ: 
2019-05-25

1491 جار خوێندراوەتەوە

ڕۆژنامەیا ئەخبارا لوبنانی بەلاڤکر، نەجمەدین کەریم پارێزگارێ بەرێ یێ کەرکوکێ هێشتا ل لوبنانێ یە و دەستبسەر پاسپۆرتا ئەمریکی یا وی دا هاتیە گرتن و ڕێ پێ ناهێتە دان گەشتا دەرڤە بکەت، هەیا دۆسیەیا وی ژ بەغدایێ دگەهیتە دەست دادگەها لوبنانێ.

ڕۆژنامەیێ د هەژمارا ئەڤرۆ شەمبیێ (٢٥ێ گۆلانا ٢٠١٩ێ) دا بەلاڤکریە، نەجمەدین کەریم کو ل ڕۆژا ٢٢ێ ڤێ مەهێ ل بالافرخانەیا ناڤدەولەتیا ڕەفیق حەریری ژ ئالیێ پۆلیسێن ئینتەرپول ڤە هاتیە دەستەسەرکرن، لێ دەستهەلاتدارێن لوبنانێ بۆ ڕۆژا دیڤدا ئازادکریە و ڕێگری ژ گەشتکرنا وی کریە و دەست بسەر پاسپۆرتا ئەمریکی یا وی دا گرتیە.

ئاشکرا ژی کریە، سەدەما ڕێگریکرن ژ گەشتکرنا نەجمەدین کەریم ئەوە، کو دەستهەلاتدارێن لوبنانێ چاڤەڕێی هنارتنا دۆسیەیا دادوەریا ناڤبری نە بۆ بەیروتێ، ب مەرەما بڕیاردانا پێدڤی دەربارەی وێ یەکێ کو ڕادەستی دادگەهێن عێراقێ بکەن.

ژ ئالیەکێ دی ڤە ڕۆژنامەیێ ژ زارێ چەند چاڤکانیێن دیپلۆماتیێن عێراقێ بەلاڤکریە، بەغدا هەموو بزاڤێن هەولێرێ ژ پێخەمەت ئازادکرنا نەجمەدین کەریم ڕەتدکەت، ژبەر کو ناڤبری ژ ئالیێ دادگەهێن عێراقێ ڤە هاتیە داخوازکرن نەک دەزگەهێ دادوەریا هەرێما کوردستانێ.

دیارکریە ژی، ئەوا دهێتە گوتن کو بەغدا دخوازیت بلەز پارێزگارێ بەرێ یێ کەرکوکێ بهێتە ڕادەستکرن دوورە ژ ڕاستیێ، لێ ئەو دخوازن دادگەهـ ڕێیا خۆ بگریت.

ب گوتنا ڕۆژنامەیێ دادگەها عێراقێ چەند تۆهمەت لسەر نەجمەدین کەریم هەنە، هەری دیار ژی دۆسیەیا ئەولەهی و داراییە.

هەر ب گوتنا ڕۆژنامەیێ کو ژ زارێ چەند چاڤکانیێن کوردستانێ دەست کەفتنە، ئەیاد عەلاوی سەرۆکێ هەڤپەیمانا نیشتیمانی مژولی ناڤبەینکاریێ یە دگەل دەستهەلاتدارێن لوبنانێ دا بۆ ئازادکرنا نەجمەدین کەریم، ئەو ژی ژبەر وێ پەیوەندیا مکوما دگەل ڕەفیق حەریری سەرۆک وەزیرێ لوبنانێ دا هەی.

ئەڤە ژی دەمەکێ دایە، نەجمەدین کەریم پارێزگارێ بەرێ یێ کەرکوکێ ڕۆژا ٢٢ێ ڤێ مەهێ بۆ دیجیتال میدیایا ئێن ئاڕ تی ڕاگەهاند، ئەو د نها دا ب گەشتەکێ ل بەیروتا پایتەختێ لوبنانێ یە و نەهاتیە دەستەسەرکرن.

نەجمەدین کەریم د داخویانیەکێ دا بۆ دیجیتال میدیایا ئێن ئار تى دازانین، ژ ئالیێ پۆلیسان ڤە بۆ چەند خولەکان هاتیە گازیکرن و گوتنە وی کو ناڤێ وى د گەل ناڤێ کەسەکێ دی تێکهەل بوویە.

نەجمەدین کەریم کو بەریا نها ئەندامێ مەکتەبا سیاسى یا یەکێتیێ بوویە، پشتى بوویەرێن ١٦ێ ئۆکتۆبەرێ ، باژارێ کەرکوکێ بجهـ هێلا و ل هەولێرێ ئاکنجى بوو، هەر د وێ دەمێ دا پەیوەندیا وى دگەل یەکێتیێ قوت بوو.

د دەستپێکا ئەڤ سالە دا و ب دیارى کرى ژى ل ڕۆژا ١٩ێ چلەیا ٢٠١٩ێ نەجمەدین کەریم دەستبەردانا خۆ ژ یەکێتیا نیشتیمانى یا کوردستانێ ڕاگەهاند و ڕۆژا ١٦ێ سباتا ٢٠١٩ێ سەرکردایەتیا یەکێتیێ نەجمەدین کەریم د ڕێزێن یەکێتیێ دا دەرخست.

س.م