سەرنووچە:

پارلەمانێ عێراقێ گۆتۆبێژا مەترسیێن هێرشێن ئەمریکایێ بۆ سەر هێزێن ئەولەهیێ دکەت

فۆتۆ: 
2019-05-18

199 جار خوێندراوەتەوە

ئەڤرۆ پارلەمانێ عێراقێ دێ جڤیت و گۆتۆبێژێ لسەر چەند پرسان کەت، دناڤا وان دا ژی هێرشێن ئەمریکایێ بۆ سەر هێزێن ئەولەهیێ یێن عێراقێ.

لگۆڕی کارنامەیا جڤینێ، تەوەرێن دی یێن جڤینا پارلەمانی تایبەتن ب پرسا مادەیێن کۆبۆنا بەشێن خوارنێ، هەلوەشاندنا بڕیارا یەکخستنا وەزارەتا ساخلەمیێ و ژینگەهێ.

دوهی کەریم علێوی ئەندامێ لیژنەیا ئاسایش و بەرەڤانیا پارلەمانێ عێراقێ ڕاگەهاندبوو، د خشتەیا کارێ ڕۆنشتنا پارلەمانێ عێراقێ دا برگەیەک یا تایبەتە ب هێرشێن ئەمریکا بۆ سەر هێزێن ئەولەهیێ و گۆتۆبێژکرنا هەبوونا هێزێن وی ولاتی د عێراقێ دا ژ ئالیێ یاسایێ ڤە.

هەروەسا دیارکربوو، واشنتۆن داخوازا ڤالاکرنا بالیۆزخانەیا خۆ ل بەغدایێ دکەت ب وێ سەدەمێ کو عێراق نەیا ئارامە، ئەڤە ژی وەک هێجەتەکێ یە ژبۆ کو سەربازێن زێدەتر بۆ عێراقێ بشینیت.

ئەڤە ژی دەمەکێ دایە، د ڤێ حەفتیێ دا ویلایەتێن هەڤگرتیێن ئەمریکایێ بڕیاردا کارمەندێن نەبنەڕەتیێن خۆ د بالیۆزخانەیا ولاتێ خۆ ل بەغدایێ و کونسولخانەیا هەولێرێ ڤەگەڕینیت بۆ ئەمریکا، هێجەتا وێ پێنگاڤی ژی هەبوونا ئالۆزیێن ئەمریکا و ئیرانێ یە د دەڤەرێ دا.

س.م