سەرنووچە:

٣٦ کۆچبەرێن عێراقی و ئیرانی لسەر سنورێ دەریایا بەریتانیایێ هاتن دەستەسەرکرن

خواستنە ب بەلەمان دەربازببن
فۆتۆ: 
2019-04-23

261 جار خوێندراوەتەوە

هێزێن کەنارێن دەریایا بەریتانیایێ ٣٦ کۆچبەرێن عێراقی و ئیرانی دەستەسەرکرن، کو خواستنە ب بەلەمێن بچیک خۆ بگەهیننە بەریتانیایێ.

میدیایا ئەلمانیێ بەلاڤکر، دوهی دووشەمبیێ (٢٢ێ نیسانا ٢٠١٩ێ) هێزەکا کەنارێن دەریایا بەریتانیایێ ٣٦ کۆچبەرێن نەیاسایی د سێ بەلەمێن بچیک دا دەستەسەرکرنە، کو خواستنە د دەریایا "مانش" یا ناڤبەرا بەریتانیا و فەرەنسایێ دا دەربازیی بەریتانیایێ ببن.

د یەک ژ بەلەمان دا ١١ کۆچبەر هاتنە دەستەسەرکرن کو وەلاتیێن ئیرانی بوون و د سپێدەهیەکا زوو دا هێزێن کەنارێن دەریایێ ئەو کۆچبەر دەستەسەرکرنە و دەستبجێ بۆ باژارێ دۆڤەری یێ بەریتانیایێ ڤەگوهاستنە ب مەرەما پشکنین و چاڤدێریکرنا ساخلەمیا وان، پشترا دەستپێکرنا ڤەکۆلینێ دگەل دا.

د بەلەما دوویێ دا ژی، ١٥ زەلام و ژنەک و زارۆکەک تێدابوونە و تەڤاهیا وان وەلاتیێن عێراقی بوون.

لێ د بەلەما سێیێ دا ٩ زەلام و ژنەک هاتنە دەستەسەرکرن، کو تەڤاهیا وەلاتیان عێراقی بوون و پشتی دەستەسەرکرنا وان بۆ باژارێ دۆڤەرا بەریتانیایێ هاتنە ڤەگوهاستن.

د دەما شەش مەهێن دەربازبوویی دا ولاتێ بەریتانیایێ یەک بوویە ژ وان ولاتێن کو ب ئاوایەکێ بەرچاڤ د ناڤ ولاتێ ئەوروپایێ دا کۆچبەران بەرێ خۆ ددانێ و پڕانیا وان خواستنە ژ ئاڤا ئینگلیزی یا ناڤبەرا بەریتانیا و فەرەنسایێ دا خۆ بگەهینە وی ولاتی.

س.م