سەرنووچە:

شەش هزار چەکدارێن داعشێ ل ڕۆژئاڤایێ کوردستانێ دەستبسەرن

فۆتۆ: 
2019-04-20

154 جار خوێندراوەتەوە

سەرۆکێ فەرمانگەها پەیوەندیێن دەرڤە یا ئیدارەیا خۆسەر یا ڕۆژئاڤایێ کوردستانێ ڕاگەهاند، شەش هزار ئەندامێن ڕێکخراوا داعشێ ل دەف وان دەستبسەرن، ژ وێ هەژمارێ ژی هزار کەس وەلاتیێن عەرەبی و بیانی نە.

عەبدولکەریم عومەر سەرۆکێ فەرمانگەها پەیوەندیێن دەرڤە یا ئیدارەیا خۆسەر یا ڕۆژئاڤایێ کوردستانێ د داخویانیەکا ڕۆژنامەڤانی دا ئەڤرۆ شەمبیێ (٢٠ێ نیسانا ٢٠١٩ێ) دیارکر، دۆسیەیا دەستبسەرکریێن بیانیێن داعشێ و هەڤژینێن وان بوونە بارگرانیەکا "مەزن" لسەر ئیدارەیا خۆسەر یا ڕۆژئاڤایێ کوردستانێ، کو هەیا نها چەندین جاران داخواز ژ ولاتێن وان هاتیە کرن وەرگرن و دادگەهـ بکەن.

بەحسا وێ یەکێ ژی کر، دۆسیەیا زیندانیێن چەکدارێن داعشێ و ڕادەستکرنێ بۆ ولاتێن وان، ژ دیارترین وان ئاریشەیانە کو د تێکشکاندنا داعشێ ڕاستی وان بوونە.

بەحسا وێ یەکێ ژی کر، "نێزیکی ٦ هزار چەکدارێن داعشێ ل دەف مە دەستبسەرن، د ناڤ وان دا ژی هزار چەکدارێن ٥٠ وەلاتێن عەرەبی و ئەوروپینە، تەڤاهیا یێن دی ژی سوری و عێراقینە".

ڕاگەهاند ژی، حکومەتا وان ولاتێن بیانی هەیا نها ژی ڕەتدکەن کو پێشوازیێ ژ وەلاتیێن خۆ بکەن، ژبەر وێ ژی داخوازا پێکئینانا دادگەهەکا ناڤدەولەتی دکەن، کو بارەگەهێ وێ ل ڕۆژئاڤایێ کوردستانێ بیت، ژبەر هەبوونا گەلەک بەلگە و دۆکیۆمێنت و دیدەڤانان، کو ئەو چەکدارێن داعشێ پێ دهێنە تۆهمەتبارکرن، ل گۆری یاسا و پیڤەرێن ناڤدەولەتی بهێنە دادگەهکرن.

زێدەباری بانگهێشتا ئەمریکا بۆ وەرگرتنا وان کەسان، لێ پڕانیا دەولەتێن ڕۆژئاڤا دوو دلن یان ڕەتدکەن کو وان وەلاتیان وەرگرن، ڤێ یەکێ ژی ئەمریکا پالدایە کو دگەل بەرپرسێن ئیدارەیا ڕۆژئاڤایێ کوردستانێ بکەڤنە گۆتۆبێژان، ب مەرەما پێکئینانا دادگەهەکا ناڤدەولەتی و ئاڤاکرنا زیندانێن پیدڤی بۆ دەستبسەرکرنا وان چەکدارێن داعشێ.

پێشتر ڕاپۆرتێن ڕۆژنامەڤانی  تەکەزدکرن، بەرپرسێن عێراقێ بەرهەڤی نیشاندانە بۆ دادگەهکرنا ٢٠ هزار چەکدارێن داعشێ د ولاتێ خۆدا، ب مەرجەکێ کۆژمێ ١٠ ملیار دۆلاران بۆ دابینبکەن، وەک کرێیا تێچوونا دادگەهکرنێ.

 س.م