سەرنووچە:

بالیۆزێ تورکیایێ: هەبوونا هێزێن مە ل باشیکێ لسەر داخوازا بەرپرسێن پلە بلندێن عێراقێ بوویە

فاتیح یەڵدز بالیۆزێ تورکیایێ ل عێراقێ
فۆتۆ: ئەرشیف
2019-04-16

180 جار خوێندراوەتەوە

فاتیح یەڵدز بالیۆزێ تورکیایێ ل عێراقێ ڕاگەهاند، هەبوونا هێزێن ولاتێ وان ل دەڤەرا باشیک، لسەر داخوازا بەرپرسێن پلە بلندێن عێراقێ بوویە و لهەڤتێگەهشتا هەڤبەش دێ دەرکەفتنا وان هێزان دیار کەت.

یەڵدز ئەڤرۆ سێشەمبیێ (١٦ێ نیسانا ٢٠١٩ێ) د کۆنفرانسەکا ڕۆژنامەڤانی دا ل باژارێ نەجەف ڕاگەهاند، "هەبوونا هێزێن تورکیایێ لسەر داخوازا بەرپرسێن پلە بلندێن عێراقێ بوویە و یەکپارچەیا ئاخا عێراقێ گەلەک گرنگە ل دەف مە، لهەڤتێگەهشتنا هەڤبەش دێ دەرکەفتنا وان هێزان دیارکەت و وی بابەتی باندووری لسەر پەیوەندیێن بازرگانیێن ناڤبەرا هەردوو ولاتان دا نابیت و ئاریشەیێ دروست ناکەت".

بالیۆزێ تورکیایێ گوت، "هاتینە ژبۆ کو گۆتۆبێژان لسەر چەند دۆسیەیان بکەن، ژ وان ژی ڤەکرنا کونسولگەریا تورکیا ل پارێزگەها نەجەف و وەرگرتنا ڕێکارێن پێدڤی، زێدەباری ئاخافتن لسەر چەند دۆسیەیێن د بیاڤێ ئابووری و بازرگانی دگەل عێراقێ دا، کو پێشڤەچوونێن باش تێدا بدەستڤە هاتنە".

ئەڤە دەمەکێ دایە، نڤیسینگەها حەیدەر عەبادی سەرۆک وەزیرێ بەرێ یێ عێراقێ ل سالا ٢٠١٥ێ ڕاگەهاند، حکومەت ئاگەهدارە لسەر هاتنا هێزەکا تورکی ب قەبارەیێ فەوجەکا زریپۆش و هەژمارەک ژ تانک و تۆپێن گران بۆ ناڤ ئاخا عێراقێ، ب دیارکر ژی بۆ پارێزگەها نەینەوا، تەکەز کریە ژی هاتنا ئارتێشا تورکیایێ لسەر داخواز و مۆلەتا دەستهەلاتدارێن حکومەتا عێراقێ نەبوویە.

س.م