سەرنووچە:

عێراق.. دادگەهکرنا ٩٠٠ چەکدارێن داعشێ دەستپێکر

پشتی کو ژ ئالیێ هەسەدێ ڤە هاتنە ڕادەستکرن
فۆتۆ: ئەرشیف
2019-04-14

239 جار خوێندراوەتەوە

دەستهەلاتدارێن دادوەری یێن عێراقێ دەست ب دادگەهکرنا ٩٠٠ وەلاتیێن عێراقی کر، کو تۆهمەتا ئەندامبوونا ڕێکخراو داعشێ لسەرە و د ڤان داوییا دا ژ ئالیێ هێزێن سوریایا دیموکرات (هەسەدە) ڤە هاتبوون ڕادەستکرن.

ئاژانسا نووچەیی یا فەرەنسا ژ زارێ چاڤکانیەکێ دادوەریا عێراقێ بەلاڤکریە، دۆسیەیا ڤەکۆلینا ٩٠٠ وەلاتیێن عێراقی ب دەستێ وان گەهشتیە، کو ئەندامێن داعشێ بوون و ل سوریایێ هاتنە ڕادەستکرن.

چاڤکانیێ دادوەری یێ عێراقێ زەلالکریە ژی، دادگەهێن تایبەت مەند ب دۆسیەیا تیرۆرێ دەستکرنە ب دیارکرنا دەما دادگەهکرنا یەک ل دیف یەکا وان کەسان.

ئەو وەلاتیێن عێراقی د دەما کۆنترۆلکرنا دەڤەرێن بن دەستێ داعشێ ل باغۆزا سوریایێ هاتنە دەستەسەرکرن، هەسەدێ ڕادەستی بەغدایێ کرنە.

ئاژانسێ ژ زارێ چاڤکانیەکێ ئەولەهیێ یێ عێراقێ بەلاڤکریە، هەیا نها چەندین وەلاتیێن دی یێن عێراقی د زیندانێن بن دەستێ هێزێن کوردی ل سوریایێ دا مانە، چاڤەڕێی ڤەگوهاستنا وان بۆ عێراقێ دکەن، پرۆسە ژی د دەڤەرەکا سنوری یا هەڤبەش د ناڤبەرا عێراق و سوریایێ دا لسەر خۆ بڕێڤەدچیت.

ئەو یەک ژی دیارکریە، د ناڤ وان زیندانیکریێن عێراقێ دا سەرکردەیێن دیار و ب باندوور یێ ن داعشێ تێدانە، یەک ژ وان شاڕەزایێ بیاڤێ کیمیایێ یە.

هەڤدەم دگەل هەژامارا وان وەلاتیێن عێراقی بەغدا د بەرهەڤیان دایە بۆ دادگەهکرنا ١٢ کەسێن دی کو هەلگرێن ناسنامەیا فەرەنسینە و ل سوریایێ هاتنە دەستەسەرکرن بۆ عێراقێ ڤەگوهاستنە، کو دهێتە چاڤەڕێکرن سزایێ بدارڤەکرنێ بسەردا بهێتە سەپاندن.

پێشتر ژی عێراقێ هزاران کەس ژ وەلاتیێن خۆ ب تۆهمەتا ئەندامبوون د ڕێکخراوا داعشێ دا دادگەهکرنە، کو هەژمارەک ژ وان ژن بوون و ب سەدان کەسان ژی سزایێ بدارڤەکرنی بسەردا سەپاندیە.

س.م