سەرنووچە:

عێراق و ئیران دەڤەرەکا پیشەسازییا هەڤبەش ل هەرێما کوردستانی ئاڤادکەن

کۆنفرانسا ڕۆژنامەڤانی یا عادل عەبدولمەهدی و حەسەن ڕۆحانی
فۆتۆ: نڤیسینگەها عادل عەبدولمەهدی
2019-04-06

196 جار خوێندراوەتەوە

سەرۆک وەزیرێ عێراقێ ب سەرەدانەکا دوو ڕۆژی گەهشتیە ئیرانێ و دگەل سەرۆک کۆمارێ ئیرانێ جڤیا و ڕێکەفتن لسەر ئاڤاکرنا سێ دەڤەرێن پیشەسازی یێن هەڤبەش کو یەک ژ وان ل هەرێما کوردستانێ دبیت.

د کۆنفرانسەکا ڕۆژنامەڤانی یا هەڤبەش دا دگەل حەسەن ڕۆحانی، عادل عەبدولمەهدی ڕاگەهاند، عێراق د نها دا ل هەموو دەمان ئارامترە و دخوازن داویێ ب سەردەمێ شەڕ و ناکۆکیان د دەڤەرێ دا بینن.

تەکەز کر ژی، بەرهەڤی ڕووبڕوونا هەر مەترسیەکێ نە کو ڕووبڕووی عێراق و ئیران و ولاتێن دەڤەرێ ببن.

هەڤدەم حەسەن ڕۆحانی سەرۆک کۆمارێ ئیرانی ڕاگەهاند، دگەل عادل عەبدولمەهدی چەوانیا جیبجیکرنا ڕێکەفتنا ناڤبەرا هەردوو ولاتان گۆتۆبێژکرنە.

بەحسا وێ یەکی ژی کر، پێنگاڤێن باش دەربارەی هەڤکاریێن هەردوو ولاتان د بیاڤی بەنک و دارایێ دا هاڤێتنە، دخوازن قەبارەیا لهەڤگۆهەرتنێن بازرگانیێن ناڤبەرا خۆدا سالانە بگەهینە ٢٠ ملیار دۆلاران.

ڕۆحانی بەحسا وێ یەکێ ژی کر، ڕێکەفتنە لسەر دروستکرنا سێ دەڤەرێن پیشەسازی کو دوو ژ وان ل باشور و ڕۆژئاڤایێ عێراقێ دبن، یا دی ژی ل هەریما کوردستانێ.

پشتی دەستنیشانکرنا وی وەک سەرۆک وەزیرێ عێراقێ، ئەڤە ب یەکەمین سەرەدانا عادل عەبدولمەهدی دهێتە دانان بۆ وی ولاتی، دەمەکێ دا ل ١٢ێ مەها دەربازبوویی پشتی نێزیکی شەش سالان ژ دەستبکاربوونێ وەک سەرۆک کۆمارێ ئیرانێ حەسەن ڕۆحانی سەرەدانا بەغدایێ کر.

س.م