سەرنووچە:

بەشەک ژ پەنابەرێن عێراقێ ل رۆژئاڤایێ کوردستانێ، ناخوازن ڤەگەرن وەلاتێ خوە

زیدەتر ژ ٣٠ هەزار پەنابەرێن عێراقێ ل رۆژئاڤایێ کوردستانێ هەنە
کەمپا هۆلێ یا رۆژئاڤایێ کوردستانێ
فۆتۆ: 
2019-04-05

197 جار خوێندراوەتەوە

بەشەک ژ پەنابەرێن کامپا هۆلێ یا رۆژئاڤایێ کوردستانێ کو خەلکێ پارێزگەها نەینەوایێ نە، ناخوازن ڤەگەرن عێراقێ.

ئاژانسا هاوارنیوز یا رۆژئاڤایێ کوردستانێ ژ زارێ هەژمارەک وەلاتیێن عێراقێ کو د کەمپا هۆلێ دا بجهبوونە دازانین، ئاوارەیێن عێراقێ ناخوازن ڤەگەرن وەلاتێ خوە و دیاردکن کو وەلاتێ وان هێشتا ب ئەولەهـ نینە.

وێ ئاژانسێ دازانین، بەشەکا کێم یا وەلاتیێن عێراقێ، سەردانا ئالیێن پەیوەندیدار کرنە و داخوازا ڤەگەرێ کرنە، لێ دخوازن ب ئاوایەکێ فەرمی ڤەگەرن و ژیانا وان بێ پاراستن.

رێڤەبەریا خوەسەر یا هەرێما جزیرا رۆژئاڤایێ کوردستانێ ژ بۆ پەنابەرێن عێراقێ کو د سالا ٢٠١٦ێ دا ژ بەر چەکدارێن داعشێ رەڤیابوون، ل ناڤچەیا هۆلێ کەمپەک ڤەکر.

ل گۆری داخویانیا فەرمیا دەستەیا پەنابەران یا هەرێما جزیرێ، ٣٠ هەزار و ٣٦٧ پەنابەرێن عێراقی د کەمپا هۆلێ دا هەنە.

چەند رۆژ بەرێ ئاژانسا هاوارێ ژ زارێ ژیدەرەکی ژ وەزارەتا مافێ مرۆڤان و کاروبارێ کۆچبەران یا عێراقێ دازانین، حکومەتا عێراقێ هەول ددە د گەل بەرپرسێن رۆژئاڤایێ کوردستانێ هەڤدیتنێ پێک بینە و وەلاتیێن پاریزگەها نەینەوایێ کو ئاوارە بوونە، ژ بۆ عێراقێ ڤەگەرینن.

هـ.ج