سەرنووچە:

عەبدولمەهدى فەرمانەکا دیوانى دەربارەى کارێن پارێزگەها نەینەوا دەرکر

عەبدولمەهدى فەرمانەکا دیوانى دەربارەى کارێن پارێزگەها نەینەوا دەرکر
فۆتۆ: 
2019-03-22

518 جار خوێندراوەتەوە

عادل عەبدولمەهدى سەرۆک وەزیرێ عێراقێ فەرمانەکا دیوانى دەرکر بۆ پێکئینانا "شانەیا کریزێ ـ شانەیا پرکرنا کاران" ل پارێزگەها نەینەوایێ، ب مەرەما برێڤەبرن و جیبجیکرنا کارێن پارێزگەهێ، هەیا وى دەمێ جڤاتا پارێزگەهێ بریارەکێ ددەت ل بەر ڕۆناهیا ڤەکولینێن بوویەرا بن ئاڤ کەتنا وێ بەلەما گەشتیارى بیت.

نڤیسینگەها ڕاگەهاندنا سەرۆک وەزیرێ عیراقێ د بەیاننامەیەکێ دا ئەڤرۆ ڕۆژا ئەینى ٢٢ێ ئادارا ٢٠١٩ێ بەلاڤکر، لگورى ئەو دەستهەلاتا ب وى هاتیە دان، بریارا شانەیا کریزێ یان شانەیا پرکرنا کاران دا، ب سەدەما ئەوێ ڕەوشا ل  پارێزگەها نەینەوا درۆستبووى، ب تایبەتى پشتى کارەساتا بن ئاڤ کەتنا وێ بەلەما گەشتیارى.

شانەیا کریزێ یان پرکرنا کاران  دێ ڕاستەوخۆ ب سەرۆک وەزیری ڤە یا گرێدای بیت، کو ئەندامێن وێ پێکدهێن ژ مزاحم قاسم خەیات سەرۆکێ زانکۆیا موسل و فەرماندەیێ پۆلیسێن نەینەوا و فەرماندەیێ ئۆپراسیۆنێن نەینەوا، هەمى ئەرکەکێ جیبجیکرنێ دێ ل پارێزگەهێ برێڤەبەن.

د بەیاننامەیێ دا زەلال ژى کر، پێدڤیە ل سەر شانەیا کریزێ یان شانەیا پرکرنا کاران لەزێ بکەن د تەمام کرنا ڤەکولینان دا و وان کەسان سزا بدەن یێن کێم خەمیا وان بوویە سەدەمێ ڕوودانا وێ کارەساتێ و پێدانا قەرەبوویەکا پێدڤى.

د داویا بەیاننامەیێ دا دیار کر، پێدڤیە هەمى ئالیێن سیاسی د ئاستێ بەرپرسیاریەتیێ بن، دوور بکەڤن ژ هەڤدوو تومەتبارکرنێ ب ئاوایەکێ کو زیانێ ب خەلکێ موسلێ بگەهینن.

دوهی پێنجشەمبیێ د یەکەم ڕۆژا وەرزێ بهارێ دا، دەما کو هەژمارەکا خەلکی بۆ گەشت و سەیرانان قەستا باکورێ ڕووبارێ دیجلە کربوو،  بەلەمەک دناڤ ڕووباری دا بنئاڤبوویە و گەلەک قوربانی لدیف خۆ ئینان، لگۆری داوی ئامار هەژمارا وان کەسێن بسەدەما بنئاڤبوونا بەلەمێ جانێ خۆ ژدەستداین بۆ نێزیکی ١٢٠ کەسان بلندبوویە