سەرنووچە:

هەسەدێ ڕەتکر ڕێکەفتن بۆ ڕادەستکرنا چەکدارێن داعشێ دگەل عێراقێ کربیت

هەژمارەکا چەکدارێن داعشێ خۆ ڕادەستی شەرڤانێن هەسەدێ دکەن
فۆتۆ: ڕۆیتەرز
2019-03-15

141 جار خوێندراوەتەوە

هەسەدێ ڕەتکر ڕێکەفتن دگەل بەغدایێ کربیت بۆ ڕادەستکرنا چەکدارێن عێراقی یێن داعشێ.

ئاژانسا ڕۆیتەرز بەلاڤکر ئەڤرۆ ئەینیێ (١٥ێ ئادارا ٢٠١٩ێ) کینو جوبرائیل پەیڤدارێ هێزێن سوریایا دیموکرات ڕەتکر، ڕێکەفتن دگەل عێراقێ دا هەبیت بۆ ڕادەستکرنا چەکدارێن داعش و هەڤژین و زارکێن وان، کو ژ ئالیێ وان ڤە هاتنە دەستەسەرکرن.

کینو داخویانیێن هندەک بەرپرسێن عێراقی ڕەتکرن کو بەحسا ڕێکەفتنا ناڤبەرا ولاتێ وان و هەسەدێ کربوون بۆ ڕادەستکرنا چەکدارێن عێراقی یێن ناڤ داعشێ دا و گوت، ئەو داخویانی دوورن ژ ڕاستیێ و چ ڕێکەفتنەک دەربارەی وێ یەکێ نەهاتیە کرن.

لیژنەیا ناڤدەولەتی یا هەیڤا سور ژی ڕۆژا دووشەمبیا بووری ئاشکرا کر، دهێتە پێشبینیکرن حەفتیا داهاتی د کڤانێ وێ ڕێکەفتنا دگەل بەغدایێ هاتیە کرن، دوو هزار ولاتیێن عێراقی بۆ ولاتێ وان بهێنە ڤەگەڕاندن، کو د ناڤا وان دا ژن و زارۆک هەنە و ل دەرڤەرێن باغۆزێ ڕەڤینە.

ئەڤە ژی دەمەکێ دایە، دوو چاڤکانیێن عێراقێ (٢١ێ سباتا ٢٠١٩ێ) بۆ ئاژانسا ڕۆیتەر ڕاگەهاند، هێزێن سوریایا دیموکرات (هەسەدە) گرۆپەکا ١٥٠ کەسی ڕادەستی ئارتێشا عێراقێ کریە، کو خەلەکا یەکێ یا وان ٥٠٢ چەکدارێن ڕێکخراوا داعشێ نە کو ڕێکەفتن لسەر هاتیە کرن ڕادەستی حکومەتا عێراقێ بکەن.

س.م