سەرنووچە:

عێراق و ئیران بۆ هاتن و چوونا سەرمایەدار و خوەدان کارێن هەردوو وەلاتان رێ خوشکرنێ دکەن

فۆتۆ: 
2019-03-11

177 جار خوێندراوەتەوە

نڤیسینگەها راگەهاندنا عادل عەبدولمەهدى سەرۆک وەزیرێ عێراقێ بەلاڤکر، کۆمەلەک یاداشتێن لهەڤ تێگەهشتنێ د ناڤبەرا عێراق و ئیرانێ دا هاتنە ئیمزا کرن،  د ناڤ دا یاداشتا رێ خوشکرنێ بۆ هاتن و چوونا سەرمایەدار و خوەدان کارێن ناڤبەرا هەردوو وەلاتان دا هاتە دیار کرن.

نڤیسینگەها عادل عەبدولمەهدى سەرۆک وەزیرێ عێراقێ ئەڤرۆ دووشەمبیێ ١١ێ ئادارا ٢٠١٩ێ بەلاڤکر، ب ئامادەبوونا عادل عەبدولمەهدى و حەسەن رۆحانى سەرۆک کۆمارێ ئیرانێ ڤێ ئێڤارێ چەند یاداشتێن لهەڤ تێگەهشتنێ د ناڤا هەردوو وەلاتان دا هاتنە ئیمزا کرن.

نڤیسینگەها عەبدولمەهدى ئاشکرا کر، یاداشت تایبەتن ب بیاڤێن نەفت، بازرگانى، ساخلەمى، ڤەگوهاستن و دامەزراندنا هێلا ئاسنى د ناڤبەرا بەسرایێ و شەلامجەیێ ل باشورێ عێراقێ دا ئەو یەک سەربارى رێ خوشکرنا بۆ هاتن و چوون و گەشتا سەرمایەدارێن هەردوو وەلاتان.

هەر د هەڤدیتن و جڤینێ دا گۆتوبێژ دەربارێ ب ئەندام بوونا هاریکاریێ و هەماهەنگیێ د ناڤبەرا هەردوو وەلاتان دا  د بیاڤێ رووبرووبوونا تیرۆرێ و بهێزکرنا ئەولەهیێ و ئارامیێ هاتیە کرن.

حەسەن رۆحانى سەرۆک کۆمارێ ئیرانێ ئەڤرۆ گەهشتە بەغدایێ و دگەل سەرۆک کۆمار و سەرۆک وەزیرێ عێراق و بەشەک ژ بەرپرسێن بلندێن وى وەلاتى جڤیا.

م.س