لێبوورینا ناڤدەولەتی: پرۆژە یاسایا تاوانێن ئەلیکترۆنی لسەر ئازادیا ڕادەربڕینێ د عێراقێ دا داربەیەکا گرانە
فۆتۆ: ئەرشیڤ
2019-03-02
175 جار خوێندراوەتەوە
ڕێکخراوا لێبوورینا ناڤدەولەتی ھایداریێ ددەتە عێراقێ دەربارێ پەسەندکرنا پڕۆژە یاسایا تاوانێن ئەلیکترۆنی کو تێدا سزایێن دژوار یێن گرتنێ و سزاییێن ماددی بۆ وان کەسان ھاتیە دانان کو ب ڕێکا ئینتەرنێت و تورێن جڤاکی ڕەخنەیان دگرن.
ڕێکخراوێ د ڕاگەھاندنەکێ دا دیارکریە، پرۆژە یاسا دێ چاڤدێریەکا دژوار و ھوور لسەر کەسێن ڕەخنەگر د وی ولاتی دا پەیداکەت.
رازاو ساڵحی ڤەکولەرێ تایبەت ب کاروبارێن عێراقێ د وێ رێکخراوێ دا ڕاگەھاند ، ئەو پرۆژە یاسایە داربەیەکا گرانە بۆ سەر ئازادیا ڕادەربڕینێ د عێراقێ دا.
ھەروەسا ڕاگەھاند، پرۆژە ب جورەکێ ھاتیە داڕشتن کو ب ساناھی ڕێکێ ب دەستھەلاتداران ددەت سزایێن گران لسەر وان کەسان دانن کو ڕەخنەیان دگرن، ژ وان سزایان ژی گرتنا ھەتا ھەتایێ.
ڕێکخراوا لێبوورینا ناڤدەولەتی دایەزانین ژی، ھێزێن ئەولەھیا عێراقێ د ئیلۆنا سالا ٢٠١٨ دا، ل بەغدا و باشورێ عێراقێ تەقە ل خوەنیشاندەران کریە، کو داخوازا دەرفەتێن کار و دابینکرنا خزمەتگوزاریێن دەستپێکی و چاڤدێریا ساخلەمیێ کربوون، دەستھەلاتداران ژی مافێ گەھشتن ب ئینتەرنێت و تورێن جڤاکی ئاستەنگ کریە.
تەکەزی لسەر وێ یەکێ ژی کریە، ب دیتنا خۆنیشاندەران، دەستھەلاتداران ب ئەنقەست د دەما خۆنیشاندانێ دا، ھێلێن ئینتەرنێتێ ژ کارئێخستنە و ژبەر وێ یەکێ ژی نەکارینە لھەڤگۆھەرتنێ د وێنە ڤیدۆیان دا بکەن.
س.م