سەرنووچە:

وەزارەتا دەرڤەیا عێراقێ بەیاننامەک دەربارەی خواندنکارێن ل جۆرجیایێ بەلاڤکر

پەیوەندی ب ڤیزا و پاسپۆرتێ ڤە هەیە
وەزارەتا دەرڤەیا عێراقێ بەیاننامەک دەربارەی خواندنکارێن ل جۆرجیایێ بەلاڤکر
فۆتۆ: ئەرشیف
2019-03-01

205 جار خوێندراوەتەوە

وەزارەتا دەرڤەیا عێراقێ بەیاننامەک دەربارەی ب ھەڤکاریکرنا وان خواندنکارێن عێراقی یێن کو ل ولاتێ جۆرجیایێ دخوینن بەلاڤکر.

د بەیاننامەکێ دا وەزارەتا دەرڤەیا عێراقێ، ئەڤرۆ ئەینیێ (١ێ ئادارا ٢٠١٩ێ) بەلاڤکر، ئەو گازیکرنە ب تەڤایا خواندنکارێن عێراقی یێن کو ل ولاتێ جۆرجیایێ دخوینن گەھشتیە، ژبۆ کو ھەڤکاریا وان بھێتە کرن لسەر نووکرنا پاسپۆرتێن وان یێن بسەرڤە چووی یان نووکرنا مانەڤێ بۆ ھندەکان.

د بەیانامێ دا بەحسا وێ یەکێ کریە، "دخوازین بێژینە وە، دەربارەی نووکرنا پاسپۆرتێن وان کەسان، بالیۆزخانەیا عێراقێ ل جۆرجیا بلەز دگەل وەزارەتا دەرڤە ئاخفتیە، ژبۆ کو بکارن تیمەکا وەزارەتا ناڤخۆیا عێراقێ بۆ جۆرجیایێ بشینن، بۆ دەرکرن و نووکرنا پاسپۆرتێن وان خواندنکارێن عێراقی یێن کو ل وی ولاتی دخوینن، ژ پێخەمەت ڤەگەڕیان بۆ بەغدایێ خواندنا خۆ بجھـ بھێلن".

د پشکەکا دی یا بەیانناما وەزارەتا دەرڤەیا عێرقێ دا ھاتیە، گۆتۆبێژ دگەل وەزارەتا دەرڤە کرنە و ئەو بابەتە ب گرنگ وەرگرتیە، ھەروەسا شاندەک بۆ ولاتێ جۆرجیایێ پێکئینایە، بۆ وێ مەرەمێ ژی وەزارەتا دەرڤە مژولی وەرگرتنا ڤیزا و ڕێکارێن پێدڤییە بۆ چوونا شاندا وەزارەتا ناڤخۆ بۆ وی ولاتی.

د داوییا بەیاننامێ دا دیارکریە، بالیۆزخانەیا عێراقێ ب بەردەوامی دگەل ئالیێ جۆرجیایێ و خواندنکاران دایە، ژبۆ کو بلەزترین دەم ئاریشەیا وان چارەسەر بکەت.

د نھا دا ژبەر خواندن و بازرگانیو چەند کار و چالاکیێن دی، ھەژمارەکا وەلاتیێن عێراقێ ل ولاتێ جۆرجیایێ نە.

س.م