سەرنووچە:

دەزگەھێن ئەولەھیێ یێن عێراقێ بەحسا چارەنڤیسێ ئەبوبەکر بەغدادی دکەن

ئەبوبەکر بەغدادی سەرۆکێ ڕێکخراوا داعشێ ل عێرق و سوریایێ
فۆتۆ: ئەرشیف
2019-02-19

398 جار خوێندراوەتەوە

دەزگەھێ ئاسایشا نیشتیمانیا عێراقێ تەکەز کر، چ بەلگە نینە لسەر ھەبوونا ئەبوبەکر بەغدادی ل دەڤەرێن ڕۆژھەلاتا سوریایێ و زانیاریێن کو د بەردەست دانە، بەلگەیێن سەلماندی نینە لسەر کوشتنا وی.

ڕۆپەلا ئیندپێندەنتا عەرەبی ژ زارێ بەرپرسەکێ پلە بلندێ دەزگەھێ ئاسایشا نیشتیمانیا عێراقێ، کو نەخواست ناڤێ وی بھێت ئاشکراکرن، د داخویانیەکا ڕۆژنامەڤانی دا دەربارەی چارەنڤیسێ بەغدادی سەرۆکێ ڕێکخراوا داعشێ ڕاگەھاند، زانیاریێن کو نھا د بەردەست دانە تەکەزیێ لسەر برینداربوون یان کوشتنا بەغدادی ناکەن.

دیارکر ژی، تیمەکا تایبەت دیڤچوونێ بۆ دکەن و لدیف دگەڕن، لێ چ بەلگەیەک لسەر ھەبوونا وی د دەڤەرێن ئۆپراسیۆنێن ڕۆژھەلاتا سوریایێ دا نینە.

بەحسا وێ یەکێ ژی کر، بەغدادی یەکە ژ ئارمانجێن وان، لێ تاکە ئارمانج نینە، ژبەرکو د نھا دا ئارمانج ژ ئۆپراسیۆنان ڕامالینا دەڤەرانە زێدەتر ژ وێ یەکێ لدیف کەسایەتیەکێ دیارکری دا بگەڕن.

حەفتیا دەرباسبووی فەرماندەیا ئۆپەراسیۆنێن ھەڤپشک بەلاڤکر، زانیاریێن کو بەحسا دیارکرنا جھێ بەغدادی دکەن، ھوور نینە و بەلگەیێن تەمام د بەردەست دا نینە.

ئەڤە ژی دەمەکێ دایە، حەفتیا بووری چەند میدیایان بەلاڤکرن، ئەبوبەکر بەغدادی ل دەڤەرا ھەجین یا ڕۆژھەلاتا سوریایێ ژ کودەتا و بزاڤەکا تیرۆرێ یا ناڤخۆیا ڕێکخراوا داعشێ ڕزگاربوویە، کو ژ ئالیێ ھەژمارەکا سەرکردەیێن بیانیێن ناڤ داعشێ دا پلان بۆ ھاتبوو داڕشتن.

س.م